Разам з Алесем Бяляцкім і ўкраінскім «Центром громадянських свобод», расейскі «Мемориал» атрымаў летась Нобэлеўскую прэмію міру.
Алег Арлоў зьбіраўся асабіста прысутнічаць на абвяшчэньні прысуду, але ўлады Беларусі забаранілі яму ўезд на тэрыторыю краіны. У інтэрвію Свабодзе Алег Арлоў пракамэнтаваў прысуд «Вясьне».
«З нашымі краінамі адбываецца дзівосная гісторыя. Пасьля распаду СССР здавалася, што нашыя краіны ідуць да дэмакратыі. Але пайшоў рэгрэс, у Беларусі хутчэй, чым у Расеі. А цяпер абедзьве краіны скаціліся ў таталітарызм. Як лічу, што гэтыя сыстэмы можна ахарактарызаваць як фашысцкія. Гэта адзін з многіх варыянтаў фашызму. І любы такі рэжым не цярпіць іншадумства, ня тое што апазыцыі, а любой незалежнай ад яго ініцыятывы. І таму такія прысуды. Каб запалохаць грамадзтва, каб ніхто нават пікнуць ня мог. Каб кожны разумеў, што за любое слова пасадзяць і закачаюць у асфальт». — гаворыць расейскі праваабаронца.
Алег Арлоў і Алесь Бяляцкі — сябры. Беларускі праваабаронца прыяжджаў на судовы працэс Арлова, калі таго абвінавачвалі ў паклёпе на Рамзана Кадырава, у 2010 годзе.
«Да гэтага я некалькі разоў наведваў ягоныя суды, калі яго судзілі першы раз. А пасьля, у 2018 годзе, ён наведваў суд, калі ў Чачэніі судзілі ў сфабрыкаванай справе нашага калегу з «Мемориала» Аюба Ціціева. Вось такое ў нас было ўзаемнае наведваньне судоў. Мы шмат разоў сустракаліся з Алесем. Я вельмі яго паважаю. Алесь — эрудыт, адукаваны чалавек. Ён вельмі адданы справе правоў чалавека, вельмі цьвёрды ў сваёй пазыцыі і пры гэтым вельмі сьціплы».
Алег Арлоў змог трапіць на судовы працэс супраць «Вясны» 9 студзеня. Ён расказаў пра свае ўражаньні ад паседжаньня.
«Мы ў Расеі думаем, што горш быць ужо ня можа. Пазаўчора я быў на судзе над палітвязьнем Дзьмірыем Івановым, якога садзяць за антываенныя выказваньні. У нас тут поўнае беззаконьне. Але калі апынаесься ў Беларусі, то бачыш, што Расеі яшчэ ёсьць куды падаць. У судзе ў Беларусі забараняецца нават махаць людзям у клетцы. Абвінавачаньне абсалютна дзікае. Фінансаваньне пратэставых акцыяў — гэта, аказваецца, фінансаваньне адвакацкай дапамогі, штрафаў і дапамога ахвярам беззаконьня. Гэта ж праваабарончая дзейнасьць. Або абвінавачваньне ў кантрабандзе. Людзі абсалютна законна вазілі валюту, не перавышаючы дазволенай сумы. Потым абвінавачаньне сабрала ўсе гэтыя законныя дзеяньні і сьцьвярджае, што яно незаконнае. Якое гэта мае дачыненьне да права? Ды ніякага», — гаворыць Арлоў.
Тады, пасьля паседжаньня 9 судзеня, міліцыя затрымала і прысудзіла 15 дзён арышту расейскай журналістцы Кацярыне Яньшынай, якая прыляцела ў Менск разам з расейскім праваабаронцам.
«Кацярыну тады затрымалі на выхадзе суду і абвінавацілі, што яна нібыта лаялася на міліцыянтаў. Я пачаў абурацца, чаму яе забіраеце, а мяне не, чаму да мяне няма прэтэнзій? А мне адказалі, што да мяне прэтэнзіяў няма. Урэшце я вярнуўся ў Расею і ніхто мне нічога не прад’яўляў», — расказвае Арлоў.
Сёньня падчас пасадкі на самалёт у Маскве супрацоўнік аэрапорта паведаміў праваабаронцу, што ён ня можа ляцець у Маскву.
«Супрацоўнік прыносіў прабачэньні ад імя „Аэрафлоту“, маўляў, мы тут ні пры чым і вось толькі што прыйшла інфармацыя, што вам забаронены ўезд у Рэспубліку Беларусь. Я, вядома ж, мог патрабаваць мяне пусьціць, бо гэта справа памежнікаў мне гэта тлумачыць. Але я разумею, што мяне б ня выпусьцілі з транзытнай зоны ў Беларусі і, хто ведае, можа я там таксама пачаў бы лаяцца матам», — гаворыць Алег Арлоў.
Ён мае намер патрабаваць тлумачэньняў ад пасольства Беларусі ў Маскве.
3 сакавіка ў судзе Ленінскага раёну Менску абвясьцілі прысуд праваабаронцам «Вясны».
Як паведамляе «Вясна», судзьдзя Марына Запасьнік прысудзіла:
- Алесю Бяляцкаму, ляўрэату Нобэлеўскай прэміі міру і заснавальніку арганізацыі, — 10 гадоў калёніі;
- Валянціну Стэфановічу, намесьніку Бяляцкага і віцэ-прэзыдэнту Міжнароднай фэдэрацыі за правы чалавека, — 9 гадоў зьняволеньня;
- Уладзімеру Лабковічу, каардынатару кампаніі «Праваабаронцы за свабодныя выбары» і юрысту, — 7 гадоў зьняволеньня;
- Дзьмітрыю Салаўёву, якога судзяць завочна, — 8 гадоў зьняволеньня.
Іх прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
