Амбасадар Нямеччыны ў Беларусі Манфрэд Хутэрэр і амбасадар Францыі Нікаля дэ Лакост сустрэліся зь міністрам замежных спраў Беларусі Ўладзімерам Макеем. Абмеркавалі міжнародную палітыку, двухбаковыя стасункі і сытуацыю ў Беларусі.
Амбасада Францыі ў Беларусі сьцьвярджае, што гаварылі «канструктыўна».
Амбасадары перадалі Макею занепакоенасьць урадаў сваіх дзяржаваў з прычыны сытуацыі з правамі чалавека ў Беларусі і нагадалі пра пазыцыю Эўразьвязу, што адносіны немагчыма будзе нармалізаваць, пакуль:
- ня будзе пакладзены канец сілавым дзеяньням, накіраваным супраць мірных дэманстрантаў,
- ня будуць вызваленыя ўсе палітвязьні і
- ня будзе пачаты шырокі ўсебаковы палітычны дыялёг і, як вынік, праведзеныя новыя прэзыдэнцкія выбары.
Нядаўна ў інтэрвію беларускаму тэлебачаньню Ўладзімер Макей заявіў, што ў адказ на замежны ціск беларускія ўлады зьнішчаць грамадзянскую супольнасьць. Гаворачы пра пазыцыю Захаду, Макей адзначыў: «Любое далейшае ўзмацненьне жорсткасьці санкцый прывядзе да таго, што грамадзянская супольнасьць, пра якую яны клапоцяцца, перастане існаваць. І гэта будзе, я лічу, абсалютна абгрунтавана ў дадзенай сытуацыі».
