Шукаюць вінаватых у абразах у тэлеграм-каналах.
Як паведамляе «Беларуская асацыяцыя журналістаў», раніцай сьледчыя ў Слоніме прыйшлі зь ператрусам да галоўнай рэдактаркі недзяржаўнага выданьня «Газета Слонімская» Ганны Валадашчук. Пасьля абеду прыйшлі зь ператрусам і ў рэдакцыю.
Ператрус праводзілі з санкцыі пракурора ў сувязі з тым, што ў мясцовых тэлеграм-каналах выявілі паведамленьні з абразамі.
Ганна Валадашчук у размове з прадстаўнікамі Беларускай асацыяцыі журналістаў заявіла, што ня мае дачыненьня ні да якіх тэлеграм-каналаў і паклёпніцкіх паведамленьняў.
У спадарыні Ганны пыталіся пра тэлеграм-канал «Слоним для жизни»: хто яго мадэруе, хто фінансуе.
Міліцыянты забралі з дому два кампутары, sim-карты, флэш-накапляльнікі.
Пасьля ператрусу дома работнікі міліцыі без папярэджаньня прыехалі ў рэдакцыю «Газеты Слонімскай». У рэдакцыі таксама забралі кампутары ў журналістаў, бухгальтэрыі, у рэклямным аддзеле.
Ганна Валадашчук расказала, што ў рэдакцыі цяжкае фінансавае становішча, ёсьць крэдыт на гаспадарчую дзейнасьць, на выплату заробкаў. Цяпер рэдакцыя ня зможа выпускаць газэту — адпаведна, ня зможа і выплаціць заробкі супрацоўнікам.
Паводле слоў рэдактаркі, сёньня ператрусы адбыліся і ў некаторых слонімскіх актывістаў. Пра гэта яна даведалася ў аддзяленьні міліцыі.
