16 верасьня ў Бабруйску скончыўся суд над вэтэрынарам мясакамбінату Кацярынай Корзан, зборшчыцай подпісаў за адкліканьне дэпутата. Яе аштрафавалі за ўдзел у несанкцыянаваным мерапрыемстве.
Кацярыну Корзан затрымалі міліцыянты ў цывільным 2 верасьня на прахадной мясакамбінату, калі яна ішла на працу. Завезьлі ў ГУУС, дзе падверглі зьняважліваму дагляду і пратрымалі да 23:30. Падпалкоўнік Сяргей Рудзько, вядомы перасьледамі «апазыцыі», вінаваціў яе ва ўдзелах у мітынгах папярэдніх дзён, у зборы подпісаў, пагражаў што «усё роўна подпісы дастане».
Суд цягнуўся некалькі дзён, Кацярыну бараніў адвакат. Кацярына Корзун заяўляла, што 30 жніўня сапраўды прыйшла на плошчу Леніна, адкуль стартавала шэсьце, але выключна з мэтай законнага збору подпісаў за правядзеньне сустрэчы з дэпутаткай Палаты прадстаўнікоў Рынейскай, у мітынгу і шэсьці ня ўдзельнічала. Міліцыянты Канавалаў і Бараценка сьцьвярджалі, што яна «размахвала рукамі і крычала» — на прадастаўленым імі відэа нічога гэтага няма.
16 верасьня судзьдзя Алена Гормаш агучыла вырак: 540 рублёў штрафу за ўдзел у мітынгу. Кацярына Корзан будзе абскарджваць вырак.
А зь сёньняшняга дня, 16 верасьня, маці трох малых дзяцей Кацярына Корзан ужо не працуе на мясакамбінаце — кантракт разарваны «па ўзгадненьні бакоў».
