Беларуская авіякампанія «Белавія» ад 25 красавіка пачне палёты па маршруце Менск — Вена — Менск, піша амбасада Беларусі ў Аўстрыі. Палёты будуць ладзіцца штодзень.
Пры тым «Белавія» плянавала распачаць палёты ў сталіцу Аўстрыі яшчэ ад 29 сакавіка, але тады аўстрыйскія ўлады не далі дазвол на выкананьне палётаў, што выклікала абураны камэнтар беларускай кампаніі.
У межах барацьбы з пандэміяй каранавірусу Аўстрыя ўводзіла санітарны кантроль на межах і скасоўвала большую частку палётаў у краіну. Аднак цяпер Аўстрыя адной зь першых у Эўропе вырашыла паступова паслабляць карантынныя захады. Ды на межах яшчэ захоўваецца жорсткі кантроль, а рэйсы нацыянальнай авіякампаніі Austrian Airlines скасаваныя да 17 траўня.
На момант публікацыі ў Аўстрыі зафіксавалі амаль 15 тысяч выпадкаў COVID-19, памерлі 470 чалавек, выпісаныя здаровымі звыш 10 тысяч. У колькасьці выпадкаў каранавірусу на душу насельніцтва Аўстрыя абганяе Беларусь у 2,5 раза, а ў прызнаных сьмерцях — у 10 разоў.
Куды яшчэ можна выляцець зь Менску
Як інфармуе адміністрацыя менскага аэрапорту, у сярэднім за суткі абслугоўваецца 15 пасажырскіх рэйсаў (прылёт + вылет) і да 5 грузавых. У красавіку мінулага году абслугоўвалася 120-125 рэйсаў.
Зыходзячы з табло прылётаў-вылетаў, дастаўкай у Беларусь і вывазам пасажыраў за мяжу займаецца толькі авіякампанія «Белавія».
Захоўваюцца авіязносіны з наступнымі краінамі:
Армэнія, Вялікая Брытанія, Ізраіль, Нідэрлянды, Турэччына, Фінляндыя, Францыя, Швэцыя, Эстонія.
Тыдзень таму «Белавія» анансавала шэраг рэйсаў у італьянскія Мілян і Рым.
Раней у сувязі з прыпыненьнем міжнародных авіяцыйных перавозак у шэрагу краін з прычыны сытуацыі з каранавірусам «Белавія» прыпыніла палёты на асобных маршрутах.
• У аэрапорты Масквы (Дамадзедава, Шарамецьева) ад 31 сакавіка па 30 красавіка.
• Ва ўсе аэрапорты Ўкраіны (Кіеў, Адэса, Львоў, Харкаў) ад 31 сакавіка да 24 красавіка.
У сувязі са зьменлівай сытуацыяй перавозчык просіць правяраць абнаўленьні на сайце авіякампаніі пра скасаваныя рэйсы.
Вярнуць сродкі або зьмяніць дату вылету на адмененыя рэйсы можна да 31 сьнежня ўключна.
Праз пандэмію каранавірусу «Белавія» спыніла палёты ў 28 краін сьвету.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
