Прэзыдэнт Расеі Ўладзімір Пуцін перадаў у Дзяржаўную думу праект паправак у Канстытуцыю, паведаміў сьпікер ніжняй палаты парлямэнта Вячаслаў Валодзін.
Паводле Валодзіна, адной з паправак у Канстытуцыю прапануецца дадаць згадку пра Бога. «Расейская Фэдэрацыя, аб’яднаная тысячагадовай гісторыяй, захоўваючы памяць продкаў, якія перадалі нам ідэалы і веру ў Бога, а таксама пераемнасьць разьвіцьця расейскай дзяржавы, прызнае гістарычна складзенае дзяржаўнае адзінства», — зачытаў Валодзін тэкст папраўкі.
Іншая папраўка, адзначыў сьпікер, прапісвае ў канстытуцыі, што шлюб — гэта саюз мужчыны і жанчыны.
Акрамя таго, папраўкі, прапанаваныя Пуціным, прапануюць замацаваць у асноўным законе, што Расея — правапераемніца Савецкага Саюзу, дадаць палажэньне аб недапушчальнасьці адчужэньня часткі тэрыторыі РФ і заклікаў да яго, а таксама даць права рэспублікам ўсталёўваць нацыянальныя мовы ў якасьці дзяржаўных разам з рускай.
Усяго прапанаваныя Пуціным папраўкі, дадаў Валодзін, «выкладзеныя на 24 старонках».
