Менгарвыканкам дазволіў правесьці 26 красавіка Чарнобыльскі шлях — штогадовае шэсьце ў гадавіну аварыі на Чарнобыльскай АЭС, піша БелаПАН са спасылкай на сустаршыню БХД Вольгу Кавалькову.
Дзе і калі будзе шэсьце?
Збор удзельнікаў заплянавалі на 18:00 перад будынкам прэзыдыюма Нацыянальнай акадэміі навук (пр. Незалежнасьці, 66).
Пачатак шэсьця ў 18:30. Дэманстранты пройдуць па вуліцы Сурганава да помніку ахвярам Чарнобыля ў парку Дружбы народаў.
Хто арганізатары?
- Партыя БНФ;
- Рух салідарнасьці «Разам»;
- Партыя «Зялёныя»;
- Рух «За Свабоду»;
- Абʼяднаная грамадзянская партыя;
- Беларуская сацыял-дэмакратычная партыя (Грамада);
- Экалягічная арганізацыя «Экадом».
У апазыцыі няма грошай на аплату міліцыі
На аплату паслуг праваахоўных органаў патрабуецца каля 7 500 рублёў. Улады забаранілі заяўнікаў арганізаваць ахову грамадзкага парадку самастойна.
Паводле, Кавальковай 22 красавіка аргкамітэт абмяркуе выхад з сытуацыі. Палітык ня выключыла, што празь недахоп сродкаў арганізатары могуць:
- адмовіцца ад шэсьця;
- правесьці мерапрыемства ў іншым фармаце.
Што важна ведаць пра аварыю на Чарнобыльскай АЭС
Аварыя на Чарнобыльскай АЭС 26 красавіка 1986 году лічыцца самай вялікай тэхнагеннай катастрофай XX стагодзьдзя.
- У атмасфэру было выкінута радыеактыўных рэчываў у 300 разоў больш, чым пасьля атамнага бамбаваньня Хірасімы ў 1945 годзе.
- З усіх краін ад наступстваў чарнобыльскай катастрофы Беларусь пацярпела найбольш — на тэрыторыі Беларусі асела звыш 70% радыенуклідаў, найбольш забрудзіўся 21 раён.
- З 2,2 мільёна чалавек, якія жылі на забруджаных землях, эвакуавалі і адсялілі 138 тысяч, яшчэ каля 200 тысяч самі зьехалі з пацярпелых тэрыторый.
- У 1986 годзе падчас аварыі на ЧАЭС з разбуранага рэактара было выкінута 1850 пэтабэкерэляў радыенуклідаў, пры гэтым на долю радыеактыўнага цэзію прыпала 270 пэтабэкерэляў. Пэрыяд паўраспаду цэзію-137 — 30 гадоў. Гэта значыць, што на 2016 год яго колькасьць на тэрыторыі Беларусі зьменшылася ўдвая.
