د پاکستان حکومت د شانګهای همکارۍ سازمان د راتلونکې سرمشریزې پر مهال په سرښار اسلام اباد کې د امنيت ډاډمن کولو لپاره د پوځ د ګومارلو منظوري ورکړې ده.
د پاکستان د کورنيو چارو وزارت د اکتوبر پر څلورمه په خپره کړې اعلاميه کې ويلي چې "لازم شمېر" پوځيان به د اکتوبر له پينځمې څخه د اکتوبر تر ۱۷مې پورې په اسلام اباد کې ځای پر ځای کېږي ترڅو د شانګهای همکارۍ سازمان سرمشريزې پر مهال امنيت او نظم وساتي.
ټاکل شوې ده چې د شانګهای همکارۍ سازمان ۲۳مه سرمشريزه به د اکتوبر پر ۱۵مه او ۱۶مه په اسلام اباد کې وشي.
شانګهای همکارۍ سازمان په ۲۰۰۱ز کال کې جوړ شو چې نهه غړي لري. چين، روسیه، قرغيزستان، قازقستان، تاجکستان او ازبکستان د هغه سازمان باني غړي دي خو پاکستان، ايران او هند یې په ۲۰۱۷ز کال کې غړيتوب تر لاسه کړ.
هغه سازمان د سیمې د سياست، امنيت او اقتصاد په برخو کې کار کوي.
دا په داسې حال کې ده چې د اکتوبر پر څلورمه پاکستان تحریک انصاف (پي ټي ای) د خپل زنداني رهبر عمران خان د خوشې کولو او "د عدلیې د ازادۍ" لپاره د اسلام اباد په جمهوریت څلورلاره یا ډي چوک کې د احتجاجي مظاهرې اعلان کړی دی.
پر دې مهال انتظامیې سرښار ته تلونکې يوشمېر لارې تړلې دي او په بېلابېلو ځایونو کې یې کانټینرونه درولي ول.
د پي ټي ای مشران وايي چې د اسلام اباد پوليسو د احتجاج پر مهال د هغوی لسګونه پلويان نيولي دي چې د عمران خان دوې خويندې هم پکې شاملې دي.
د پاکستان د کورنیو چارو وزیر د تحریک انصاف سیاستوالانو او پلویانو ته خبرداری ورکړی وو چې که په اسلام اباد کې یې د مظاهرې هڅه وکړه نو پرضد به یې اقدام وکړي.
محسن نقوي د اکتوبر پر درېیمه په اسلام اباد کې خبریالانو ته وویل چې د ملایشیا د وزیراعظم په ګډون د نورو هېوادونو پلاوي د پاکستان په سفر دي نو ځکه دې تحریک انصاف احتجاج نه کوي.
