АКШнын Кыргызстандагы элчиси Лесли Вигеринин кайрылуусу:
Американы коопсуз, күчтүү жана гүлдөгөн өлкө кылуу үчүн президент Трамп АКШнын иммиграция боюнча мыйзамдарынын аткарылышын камсыз кылууда. Эгер сиз Америка Кошмо Штаттарына мыйзамсыз кирүүгө аракет кылсаңыз, виза алуу үчүн калп айтсаңыз, мыйзамдуу уруксаты жок иштесеңиз, визанын мөөнөтү же визасыз өлкөдө жүрүү убактысы аяктагандан кийин АКШда калсаңыз, анда сиз олуттуу жазага дуушар болосуз. Алардын арасында абакта кармоо, депортация жана келечекте АКШ визасын алууга биротоло тыюу салуу кирет.
Эгерде сиздин тууганыңыз же досторуңуз Кошмо Штаттарда мыйзамсыз жүргөн болсо, азыр аларга үйгө кайтып келиңиздер деп айтууга убакыт келип жетти.
Мыйзамсыз кирип барууга же өлкөдө калып калууга аракет кылуу сиздин кармалышыңызга алып келет
Айрым адамдар Америка Кошмо Штаттарына кирип барса кармалбай жүрүшү мүмкүн деп эсептешет. Бул чындыкка жатпайт. Трамптын администрациясы чек ара коопсуздугун күчөттү жана мыйзамсыз жүргөн чет элдиктердин камакка алынып, депортацияланышынын бир топ эсе көбөйттү.
2025-жылдын февралында чек арадан мыйзамсыз өтүү 2024-жылдын февраль айына салыштырмалуу 94% азайды, ал эми Кошмо Штаттардын ичинде чек арадан мыйзамсыз өткөндөрдү кармоо 627% өстү. Эгер АКШнын чек арасынан өтүүгө же Кошмо Штаттарда мыйзамсыз калууга аракет кылсаңыз, анда сиз кармалып, камалып, кайра өлкөңүзгө кайтарыласыз. Ошондой эле, сизге карата АКШга кайра кайтып келүүгө тыюу же айып пул салынышы мүмкүн жана кылмыш жоопкерчилигине тартылышыңыз ыктымал.
АКШ визасын алуудагы алдамчылыктын олуттуу кесепеттери бар
АКШ визасын алуу процесси дүйнөдө эң коопсуз болуп эсептелет. Ошентсе да айрым адамдар адашкан жолго түшүп, дагы эле жасалма документ колдонуу, арыз кагаздарында жалган маалымат көрсөтүп же визанын мөөнөтү бүткөндөн кийин калуу аркылуу системаны алдаганга аракет кылышат. Бул виза алдамчылыгынын мисалдарынын катарына кирет жана оор кылмыш болуп эсептелет. Эгер ушундай жол менен мыйзам буза турган болсоңуз, анда сиз жазага тартыласыз жана сизге Америка Кошмо Штаттарына кайра кирүүгө уруксат берилбей калышы мүмкүн.
Мындан тышкары, виза боюнча консультант-кеңешчилер сиздин виза алуу мүмкүнчүлүгүңүздү арттырбайт. Виза алуу үчүн АКШ элчилигинен башка бирөөгө акча төлөөнүн кереги жок. Сизге Америка Кошмо Штаттарында жашоо же иштөө мүмкүнчүлүгүн убада кылган адам алдамчы-шылуун болушу мүмкүн. АКШ элчилигинин жана Мамлекеттик департаменттин веб-сайттары виза алуу үчүн талаптар жана АКШ визасына арыз берүү процесси тууралуу маалыматтын бирден-бир ишенимдүү булагы.
АКШ чек арасына сапар коркунучтуу болот
Америка Кошмо Штаттарына мыйзамсыз өтүү үчүн кооптуу сапарга чыгууну ойлогондор үчүн сиздин коопсуздугуңуз, ал тургай өмүрүңүз да коркунучта экенин түшүнүшүңүздөр керек. Кылмыштуу топтор, уюшкан кылмыш картелдери жана адам сатуучулар мыйзамсыз мигранттарды бутага алып, зордук-зомбулукка, опузалоого жана кол салууга дуушар кылышат. Мындай жолго чыгууга аракет кылгандардын көбү көздөгөн жерине жете албай калышат.
Америка Кошмо Штаттары Батыш жарым шарындагы башка өлкөлөр менен биргеликте мыйзамсыз кирүүгө аракет кылган адамдарды АКШнын чек арасына жете электе токтотуу жана өз өлкөсүнө кайтаруу багытында иш алып барууда. Чек араларыбызды коргоо менен биз Америка жарандарын гана коргобостон, мыйзамсыз иммиграциянын кесепетинен келип чыккан азап-кайгыны алдын алып, болтурбоо аракетин көрүп жатабыз.
Президент Трамп ар бир адамды жооптуу болууга чакырууда
Америка Кошмо Штаттарынын өкмөтү башка адамдарга өлкөгө мыйзамсыз кирүүгө жардам берген адамдарга да каршы чара көрүүдө. Алардын катарына мыйзамсыз иммиграцияны улантууга жол берген аткезчилер, адам сатуучулар жана атүгүл чет элдик мамлекеттик кызматкерлер да кирет.
Жакында эле мамлекеттик катчы Марко Рубио мыйзамсыз иммиграцияны токтотууга жардам бере албаган чет элдик мамлекеттик кызматкерлер, анын ичинде иммиграция, бажы жана порт башкармалыктарынын кызматкерлери үчүн виза берүүдөгү чектөөнүн жаңы саясатын жарыялады. Бул чара буга чейин болуп келген, транспорт жана туризм тармагындагылар үчүн ушул сыяктуу чектөөлөргө негизделген. Мыйзамсыз иммиграцияга көмөктөшүү менен АКШнын коопсуздугуна коркунуч келтиргендер биздин өлкөдө кабыл алынбайт.
Тандоо кандай экени айкын – мыйзам жолун жолдоңуз
Америка Кошмо Штаттарына мыйзамсыз жол менен иммиграцияга кетүүгө аракет кылуунун тобокелдиктери жана коркунучтары мүмкүн болуучу пайдадан алда канча жогору. Мындай жол өмүрүңүздөн айрылып, кылмышкерлердин курмандыгы болуп же өзүңүздүн жана үй-бүлөңүздүн келечегине зыян келтирген жаман аттуу болууңуз менен аякташы мүмкүн.
Мыйзамсыз кирүү АКШ мыйзамдарын гана бузбастан, коопсуздугуңузга жана бакубат жашооңузга коркунуч жаратат. Жазалары олуттуу: абакка камоо, үй-бүлөңүздөн ажыратуу жана Кошмо Штаттарга кайра кирүүгө биротоло тыюу салуу.
Эгер сиз Америка Кошмо Штаттарында мыйзамсыз жүргөндөрдү билсеңиз, анда алар үчүн кыла турган эң чоң жакшылыгыңыз – аларды кармай электе өлкөдөн азыр чыгып кетүүгө көндүрүү.
Бул сөздүн мааниси жөнөкөй: туура тандоо жаса, мыйзамга баш ий, өз коопсуздугуңду, үй-бүлөңдү жана келечегиңди тобокелге салып, аларга коркунуч алып келбе.
Лесли Вигери, АКШнын Кыргыз Республикасындагы элчиси
Шерине