Ամենայն Հայոց կաթողիկոս Գարեգին երկրորդը խնդրել է Երևանից Բաքու մեկնած Գերմանիայի նախագահին Ադրբեջանում բարձրացնել Արցախի ժողովրդի արդար իրավունքների, ինչպես նաև հայ ռազմագերիների ազատ արձակման, հայկական ժառանգության պահպանության խնդիրները։
Շտայնմայերը, ըստ Մայր Աթոռի, հավաստիացրել է, որ իր միջնորդական ջանքերը կգործադրի ի նպաստ տարածաշրջանում վերջնական խաղաղության հաստատման։
Գերմանիայի նախագահն արդեն հանդիպել է ադրբեջանցի իր գործընկերոջը, բայց մինչև այս պահը ադրբեջանական լրատվամիջոցները չեն տեղեկացրել, թե Շտայնմայերը հայ գերիների ազատ արձակման հարց Բաքվում բարձրացրել է:
Ադրբեջանում 23 հայ ռազմագերի է պահվում, ձերբակալությունից մեկուկես տարի անց՝ այս տարվա հունվարի վերջին սկսվեց նրանցից 16-ի դատավարությունը:
Բաքվի դատարանում շարունակվել է Ռուբեն Վարդանյանի դատաքննությունը
Բաքվի դատարանում երեկ շարունակվել է Արցախի նախկին պետնախարար Ռուբեն Վարդանյանի դատաքննությունը: Այն անցկացվում է արցախցի մյուս պաշտոնյաներից առանձին:
Չնայած Վարդանյանն Արցախ տեղափոխվելու որոշումը 2022-ի սեպտեմբերին է կայացրել, բայց երեկվա դատական նիստի ժամանակ, «Ազարթաջ»-ի փոխանցմամբ, դատարան են բերվել 20-ից ավելի տուժողներ, որոնք, ինչպես ադրբեջանական պետական լրատվամիջոցն է նշել, «տուժել են» հանցավոր խմբի գործողություններից, որին Ռուբեն Վարդանյանը միացել է 2020-ի դեկտեմբերին։ Ադրբեջանի դեմ ռազմական ագրեսիայի համար ստեղծված խմբավորումը, ըստ մեղադրանքի, գործել է Հայաստանի պաշտոնյաների ղեկավարությամբ:
Բաքվի բանտում ի նշան բողոքի երկու անգամ հացադուլ հայտարարած Արցախի նախկին պետնախարարը շարունակում է ցուցմունք չտալ:
Նրա դեմ ցուցմունք տվածների թվում է եղել Քալբաջարում տեղակայված ադրբեջանական զորամասերից մեկի նյութատեխնիկական ապահովման բաժնի պետը։ Նա հայտարարել է, որ իր ծառայության վայրը հեռու է եղել հայկական զինված ուժերի հետ շփման գծից: Չնայած դրան, «տարբեր աստիճանի վնասվածքներ է ստացել ականանետային գնդակոծության ժամանակ»:
Ու չնայած տուժողները եկել էին դատարան Ռուբեն Վարդանյանի դեմ ցուցմունքներ տալու, ըստ պետական «Ազերթաջ»-ի, հայտարարել են, որ նրան անձամբ չեն ճանաչել, նրա մասին լրատվամիջոցներից ու սոցցանցերից են տեղեկացել:
Պետնախարարի պաշտոնը Վարդանյանն ուղիղ երեքուկես ամիս է զբաղեցրել:
2022-ի նոյեմբերին պաշտոնը Ռուբեն Վարդանյանն, ի տարբերություն իր նախորդի, ավելի լայն լիազորություններով ստանձնեց, բայց ուժայինները նրան չէին ենթարկվում: Սա հետ չի պահել Ադրբեջանին Վարդանյանի դեմ 42 մեղադրանք առաջադրելուց՝ պատերազմ վարելուց մինչև կտտանքների կիրառում, կանխամտածված սպանություն և ահաբեկչություն ու դրա ֆինանսավորում: Նրա միջազգային փաստաբանների խոսքով, Վարդանյանին Ադրբեջանում ընդհուպ ցմահ ազատազրկում է սպառնում:
«Գերիները պետք է ազատ արձակվեն և վերադարձվեն, և էդ դատական գործերը, էդ պրոցեսները դադարեցվեն, որովհետև դրանք անընդունելի են». - Հայաստանի իշխանությունն ակնկալում է գերիների շուտափույթ վերադարձ՝ ԱԺ արտաքին հարաբերությունների ՔՊ-ական նախագահ Սարգիս Խանդանյանն էր այսօր պնդում: Դրա համար, ասում էր, ամեն օր աշխատում են: Պատգամավորը կարծում է՝ հարցը խաղաղության պայմանագրի ստորագրմամբ էլ կարող է լուծվել, բայց դա նախապայման դարձնել էլ ճիշտ չի համարում:
«Տրամաբանական չի լինի, երբ ստորագրվի խաղաղության պայմանագիրը՝ Հայաստանի քաղաքացիներ լինեն գերեվարության մեջ Ադրբեջանում: Իհարկե, մեր ակնկալիքն այն է, որ որքան հնարավոր է շուտ վերադառնան, ազատ արձակվեն գերիները, որովհետև դա հումանիտար հարց է, ու քաղաքական, դիվանագիտական բանակցությունների որպես նախապայման դրա ներառումը, ես կարծում եմ, ընդունելի չէ», - ընդգծեց իշխող «Քաղաքացիական պայմանագրի» պատգամավորը:
Գերիների ազատ արձակման հարցում իշխանության քայլերն ընդդիմադիրները բավարար չեն համարում: Նախ կործանարար են որակում միջազգային դատարաններից հայցերը հետ կանչելու պայմանավորվածությունը, դրանց թվում նաև գերիների իրավունքների պաշտպանության հայց կա: Ընդդիմախոսները իշխանությունից գործուն քայլեր են պահանջում, հիշեցնում են՝ երկիրն իր քաղաքացիներին վերադարձնելու պարտավորություն ունի:
