Դոնալդ Թրամփը կրկին սպառնացել է մաքսատուրքեր կիրառել Ռուսաստանի նկատմամբ, եթե Վլադիմիր Պուտինը չհամաձայնի Ուկրաինայում հրադադարի գործարքին: ԱՄՆ նախագահը Սպիտակ տանը լրագրողներին ասել է, թե չէր ցանկանա մաքսատուրքեր կիրառել Ռուսաստանից արտահանվող նավթի վրա, սակայն ստիպված կլինի գնալ այդ քայլին, եթե Պուտինը չհամաձայնի:
«Ցանկանում եմ համոզվել, որ նա գործը մինչև վերջ կանի, և կարծում եմ՝ կանի: Չեմ ուզում երկրորդային մաքսատուրքեր սահմանել նրա նավթի վրա, բայց կանեմ դա, եթե տեսնեմ, որ չի անում գործարքի իր մասը», - հայտարարել է Միացյալ Նահանգների նախագահը:
Արձագանքելով Թրամփի հայտարարություններին՝ Կրեմլի խոսնակն ասել է, որ շարունակում են ԱՄՆ-ի հետ աշխատանքը, սակայն այս հակամարտությունը շատ բազմաշերտ է և հավելյալ ջանքեր է պահանջում:
«Թեման շատ բարդ է: Ուկրաինական կարգավորման հետ կապված բովանդակությունը, որ մենք քննարկում ենք, շատ բարդ է։ Այն մեծ ջանքեր է պահանջում», - հայտարարել է Դմիտրի Պեսկովը:
Ռուսաստանի փոխարտգործնախարարն, իր հերթին, International Affairs ամսագրին ասել է, որ Ռուսաստանը շատ լուրջ է վերաբերվում կարգավորման՝ ԱՄՆ առաջարկած մոդելներին և լուծումներին, բայց չի կարող դրանք ընդունել՝ առանց հաշվի առնելու իր շահերը: Սերգեյ Ռյաբկովի խոսքով՝ Վաշինգտոնն այժմ ձգտում է հասնել հրադադարի, սակայն կարգավորման ԱՄՆ տեսլականը դեռ չի ներառում հակամարտության առաջնային պատճառների վերացում։
«Մենք, անշուշտ, ունենք մեր սեփական առաջնահերթությունների և մոտեցումների խորը և մանրակրկիտ մտածված փաթեթը այս հարցի վերաբերյալ, որը մշակվում է և մշակվել է, այդ թվում՝ մեր բանակցային թիմի կողմից Ռիյադում ամերիկացիների հետ վերջին բանակցությունների ժամանակ», - ասել է Ռյաբկովը:
Երեկ էլ Թրամփն ասել էր, թե իրեն շատ է զայրացրել Պուտինի հայտարարությունը, որ Ուկրաինային անհրաժեշտ է դրսից կառավարվող ժամանակավոր կառավարություն՝ մինչև կանցկացվեն նոր ընտրություններ: Ըստ նրա՝ դա ավելի կհետաձգի խաղաղությունը, քանզի ստիպված կլինեն բանակցել նաև նոր իշխանությունների հետ:
Ուկրաինայում նախագահական ընտրություններ պետք է անցկացվեին դեռ 2024-ի գարնանը, սակայն ռազմական դրության պատճառով հետաձգվել են: Economist-ը գրել էր, թե նախագահ Զելենսկին պատրաստվում է այս ամռանն ընտրություններ անցկացնել, և արդեն դրանք նախապատրաստելու նպատակով նախագահի աշխատակազմում հանդիպում է անցկացվել: Սակայն Գերագույն ռադայի իշխող «Ժողովրդի ծառա» խմբակցության ղեկավար Դավիթ Արախամիան հերքել է դա:
«Ոչ մի ընտրություն չի պատրաստվում, ոչ մի նախապատրաստություն չի արվում, խորհրդարանական բոլոր կուսակցություններն ու խմբակցությունները համաձայնել են, որ ընտրությունները պետք է տեղի ունենան ռազմական դրության վերացումից վեց ամիս հետո», - հայտարարել է Արախամիան:
Ուկրաինացի պատգամավոր Ալեքսեյ Գոնչարենկոն, իր հերթին, ասել է, թե իր տեղեկություններով՝ ընտրությունները նախատեսվում են հրադադարից հետո, սակայն հարցն այն է, թե երբ կավարտվի պատերազմը:
«Եվ ոչ ոք չգիտի դրա պատասխանը: Սակայն եթե գիտեն, ապա իշխանությունների ծրագիրն արագ ընտրություններ անցկացնելն է», - նշել է Գոնչարենկոն:
ԱՄՆ նախագահն այսօր նաև հայտարարել է, թե Զելենսկին ցանկանում է վերաբանակցել Ուկրաինայի հազվագյուտ հանածոների համատեղ արդյունահանման գործարքը: Լրատվամիջոցներն էլ գրել էին, որ գործարքի նոր տարբերակն ԱՄՆ-ին թույլ կտա գրեթե լիովին վերահսկել ապագա բոլոր ներդրումներն Ուկրաինայի ենթակառուցվածքներում և հանքերում:
Ուկրաինայի արտգործնախարար Անդրեյ Սիբիգան տեղեկացրել է, որ նոր տեքստի շուրջ խորհրդակցություններ են սկսել ԱՄՆ-ի հետ, և վստահեցրել, որ այս տարբերակը ձեռնտու կլինի Ուկրաինային։ Սակայն Գերագույն ռադայի պատգամավոր Ալեքսեյ Մովչանը կարծում է, որ դրանով Ուկրաինան փաստացի ստրկության է վաճառվում:
«Կարծում եմ, որ դա մի փոքր է ստրկությունից պակաս: Եվս մի փոքր, և դա ստրկություն է: Այսինքն, այնտեղ որոշ կետեր ոչ միայն վտանգավոր են, այլև սարսափելի են», - հայտարարել է Մովչանը:
Համաձայնագիրը պետք է համապատասխանի եվրոպական օրենքներին, Կիևում այսօր հայտարարել է Գերմանիայի արտգործնախարար Աննալենա Բերբոքը: «Ի վերջո, սա մեր եվրոպական մայրցամաքն է», - ասել է հեռացող նախարարը՝ տեղեկացնելով, որ Գերմանիան ևս 130 միլիոն եվրոյի հումանիտար օգնություն կհատկացնի Ուկրաինային:
Այս ընթացքում ճակատում իրավիճակը մնում է լարված: Ըստ Ուկրաինայի՝ գիշերը ռուսական զինուժն անօդաչուներ չի կիրառել՝ առաջին անգամ այս տարում: Կողմերը նաև միմյանց մեղադրել են էներգետիկ օբյեկտներին հարվածելու մեջ: Ըստ Ուկրաինայի՝ այդպիսի հարվածի հետևանքով մոտ 45 հազար մարդ առանց էլեկտրականության է մնացել: Ռուսական կողմը հայտարարել է, որ ևս մեկ բնակավայր է գրավել Ուկրաինայի արևելքում, որտեղ առաջ է շարժվում:
