Երկրորդ օրն անընդմեջ ռուսական զորքերը հարվածներ են հասցրել Ուկրաինայի մեծությամբ երկրորդ քաղաք Խարկովին։ Ուկրաինայի արտակարգ իրավիճակների նախարարության տվյալներով՝ ռուսական հարվածների հետևանքով արդյունաբերական նշանակության շինություններ և երկու մանկապարտեզ է տուժել, երեք մարդ վիրավորվել է։
Ուկրաինական աղբյուրների փոխանցմամբ՝ անցած գիշեր ռուսական ուժերն ընդհանուր առմամբ 131 անօդաչու թռչող սարք և երկու «Իսկանդեր Մ» բալիստիկ հրթիռ են արձակել հարևան երկրի ուղղությամբ։ Դրանցից 57-ը, ըստ պաշտոնական Կիևի, խոցվել են, ևս 45-ը ռադիոէլեկտրոնային պայքարի միջոցների գործողությունների շնորհիվ շեղվել են նախանշված թիրախներից։
