Ստեփանակերտից այսօր Հայաստան է տեղափոխվել վերջին ռազմական գործողությունների հետևանքով ծայրահեղ ծանր վիրավորում ստացած 23 քաղաքացի:
Ըստ Արցախի առողջապահության նախարարության՝ վիրավորների տեղափոխումն իրականացվել է Կարմիր խաչի միջազգային կոմիտեի միջնորդությամբ՝ ՀՀ առողջապահության նախարարության կողմից հատկացված շտապօգնության մեքենաներով՝ համապատասխան բուժանձնակազմի աջակցությամբ:
Առաջիկայում ևս նախատեսվում է ծանր վիրավորում ստացած անձանց տեղափոխում Հայաստան։
Այսօր առավոտյան էր Երևանը հաղորդել, որ շտապօգնության 23 մեքենա մասնագետների ուղեկցությամբ Արցախից Հայաստան են տեղափոխում ծանր և ծայրահեղ ծանր վիրավորում ստացած Լեռնային Ղարաբաղի 23 քաղաքացու։
Երեկ Արցախի առողջապահության նախարար Վարդան Թադևոսյանն ասել էր, որ ծանր վիճակում գտնվող 30 վիրավորներ կան, որ պետք է Երևան տեղափոխվեն։ Նա նաև նշել էր՝ կա պայմանավորվածություն, որ Կարմիր խաչի ուղեկցությամբ Արցախ կգնան Հայաստանի շտապօգնության մեքենաները։
Մարտական գործողություններից 6 օր անց դեռ զոհերի, վիրավորների հստակ թիվ չկա, բազմաթիվ ընտանիքներ փնտրում են իրենց հարազատներին, որ ենթադրաբար մնացել են ադրբեջանական օղակի մեջ։ Արցախի Մարդու իրավունքների պաշտպանի գրասենյակի սեպտեմբերի 20-ի հրապարակած տվյալներով՝ ադրբեջանական հարձակման հետևանքով կա առնվազն 200 զոհ, ավելի քան 400 վիրավոր։ Այս թվերը չեն թարմացվել։
