«Сёньня Польшча дзякуе сваім найвыдатнейшым грамадзянам, чыіх жыцьцё зьяўляецца для палякаў прыкладам вялікага гонару», — сказаў прэзыдэнт Караль Наўроцкі падчас цырымоніі ў Прэзыдэнцкім палацы, паведаміла Польскае радыё.
Анджэй Пачобут — журналіст, блогер, актывіст польскай меншасьці ў Беларусі і даўні карэспандэнт польскага выданьня «Gazeta Wyborcza». Яго арыштавалі ў 2021 годзе і асудзілі ў 2023 годзе за меркаваную «варожую дзейнасьць» і «распаўсюджваньне нянавісьці». Польшча гадамі дамагаецца яго вызваленьня.
Сёлета Анджэй Пачобут атрымаў прэмію Сахарава, што Эўрапейскі парлямэнт прысуджае асобам, якія зрабілі выключны ўклад у барацьбу за правы чалавека.
Ордэн Белага Арла — найстарэйшая і найвышэйшая дзяржаўная ўзнагарода Рэспублікі Польшча, якая ўручаецца за выдатныя грамадзянскія і ваенныя заслугі на карысьць Рэспублікі Польшча. Ордэн уручаецца найбольш выбітным палякам і вышэйшым прадстаўнікам замежных дзяржаў.
Форум