29 верасьня ў Варшаве адбудзецца пахаваньне Сяргея Пясэцкага, удзельніка польска-савецкай вайны, выведніка, жаўнера Арміі Краёвай і выдатнага пісьменьніка, піша польскі Інстытут нацыянальнай памяці.
Цырымонія пачнецца, а 12:00, яе прыме Палявы катэдральны сабор Войска Польскага (вул. Długa 13/15).
Пасьля службы парэшткі пісьменьніка будуць пахаваныя на вайсковых могілках Павонзкі.
Сяргей Пясэцкі нарадзіўся ў 1899 годзе ў беларускіх Ляхавічах. У час польска-бальшавіцкай вайны рэгулярна перасякаў мяжу дзьвюх дзяржаў, быў таленавітым перамытнікам. У 1926-м, калі яго звольнілі са службы ў Войску Польскім, Пясэцкага арыштавалі за рабункі і пасадзілі ў турму. Спачатку асудзілі да сьмяротнага пакараньня, затым замянілі 15 гадамі турмы. Але пасьля тэрмін скарацілі да 4 гадоў.
Якраз у зьняволеньні раскрыўся пісьменьніцкі талент Пясэцкага. Раман «Каханак Вялікай Мядзьведзіцы» стаў культавым і быў перакладзены на 16 моваў сьвету, у тым ліку беларускай. Прычым апошняе выданьне перакладу на беларускую мову адбывалася з аўтарскай вэрсіі, дапоўненай і папраўленай Сяргеем Пясэцкім у 1963-м, за год да сьмерці.
У гэтым творы ён падрабязна і яскрава апісаў насычанае жыцьцё ракаўскіх кантрабандыстаў, сьведкам якому быў сам. У 2009 годзе з польскай на беларускую мову твор пераклаў Фэлікс Янушкевіч.
Апошнія гады жыцьця Пясэцкі правёў у Брытаніі, дзе захварэў на рак лёгкіх і памёр, ды быў пахаваны на могілках Borough Cemetery ў Гастынгсе.
Форум