Пра гэта паведамляе інфармацыйнае агенцтва BNS.
«Статус, які надаецца Прадстаўніцтву, дазваляе яму функцыянаваць, дзейнічаць, выконваць функцыі і мабілізаваць дэмакратычныя сілы. Я ня бачу падставаў для абмеркаваньня гэтага пытаньня ў гэты момант», — заявіў кіраўнік літоўскай дыпляматыі ў сераду.
Сініца ў сваім звароце заявіў, што Прадстаўніцтва беларускай дэмакратыі выкарыстоўвае гасьціннасьць і добрую волю, праяўленыя Літвой, не для ўсталяваньня добрасуседзкіх адносін, а для стварэньня своеасаблівай базы «альтэрнатыўнай Беларусі» у Літве.
Палітык кажа, што лідэрка беларускай апазыцыі Сьвятлана Ціханоўская ня здолела рэзка асудзіць тэорыю літвінізму, якая набірае папулярнасьць у колах апазыцыі ў Беларусі, і дазволіла сабе выказацца па пытаньнях унутранай палітыкі Літвы, напрыклад, крытыкуючы намеры абмежаваць іміграцыю зь Беларусі, зыходзячы з меркаваньняў нацыянальнай бясьпекі.
Сініца таксама скрытыкаваў мужа Ціханоўскай, Сяргея, за заявы пра магчымыя беларускія «выспы».
«Праславіўшыся падтрымкай незаконнай анэксіі Крыму Расеяй, гэты дзеяч, які пражывае ў Літве, нядаўна выказаўся пра пляны стварэньня ў Літве „нечага падобнага“ да аўтаномнага беларускага рэгіёну. Такія публічныя заявы варта разглядаць як сумнеў у тэрытарыяльнай цэласнасьці Літвы, і таму павінныя быць строга асуджаныя», — заявіў дэпутат.
У заяве, апублікаванай у сераду офісам Ціханоўскай, гаворыцца, што інфармацыя, апублікаваная Сініцам, зьяўляецца недакладнай і ілжывай і шкодзіць сяброўскім адносінам паміж народамі Літвы і Беларусі.
У заяве гаворыцца, што ў Літве створаныя офіс Ціханоўскай і Прадстаўніцтва беларускай дэмакратыі, якое атрымала акрэдытацыю ў Літве як прадстаўніцтва беларускай дэмакратычнай супольнасьці.
«Ні офіс Ціханоўскай, ні Прадстаўніцтва беларускай дэмакратыі не атрымліваюць наўпроставага фінансаваньня зь Літвы, а супрацоўнікі гэтых установаў ня маюць ніякіх асаблівых ільготаў альбо прывілеяў у Літве», — гаворыцца ў заяве.
У офісе таксама заяўляецца, што Ціханоўская і ўся апазыцыя асуджаюць праявы літвінізму і спробы распальваньня разладу паміж літоўцамі і беларусамі.
Як паведамляе BNS, палітыкі краіны называюць заявы Сяргея Ціханоўскага аб стварэньні аўтаномных беларускіх раёнаў у Літве абсурднымі, але адмаўляюць, што апазыцыя, якая ўцякла ад рэжыму Лукашэнкі, уяўляе пагрозу нацыянальнай бясьпецы краіны.
Форум