Прэзыдэнт ЗША патрабуе кампэнсацыю ў памеры ня менш за 10 мільярдаў даляраў за публікацыю, у якой сьцьвярджаецца, што ў 2003 годзе Трамп нібыта адправіў Джэфры Эпштэйну віншавальны ліст з эратычным малюнкам і намёкам на «агульныя сакрэты». Трамп настойвае, што артыкул носіць загадзя ілжывы характар і нанёс вялізную шкоду яго рэпутацыі і фінансавым інтарэсам.
Пазоў пададзены ў фэдэральны суд Паўднёвай акругі Фларыды. «Чакаю з цікавасьцю, калі Руперт Мёрдак будзе даваць паказаньні ў судзе... Гэта будзе забаўна!» —напісаў Трамп ў сваёй сацыяльнай сетцы Truth Social.
Прадстаўнік кампаніі Dow Jones, якая зьяўляецца выдаўцом WSJ, у афіцыйным камэнтары наконт падачы Трампам пазову заявіў: «Мы цалкам упэўненыя ў строгасьці і дакладнасьці нашай журналісцкай працы і маем намер рашуча абараняцца ад любых пазоваў». Dow Jones — даччыная кампанія News Corp.
Паводле публікацыі ў Wall Street Journal, ліст Трампа нібыта ўваходзіў у падарункавую кнігу да дня нараджэньня Эпштэйна. У ім зьмяшчаліся фразы, апраўленыя малюнкам аголенай жанчыны, і подпісам «Дональд». Трамп, які сябраваў з Эпштэйнам, сьцьвярджае, што разарваў адносіны зь ім задоўга да яго першага арышту.
- Джэфры Эпштэйн — фінансіст, які абвінавачваўся ў стварэньні сеткі па вярбоўцы і сэксуальнай эксплуатацыі непаўналетніх дзяўчат, якая дзейнічала шмат гадоў. У 2005 годзе Эпштэйн быў першы раз арыштаваны па абвінавачваньні ў разбэшчваньні 14-гадовай дзяўчынкі, паліцыя выявіла дзясяткі меркаваных ахвяр, аднак пракуратура ў таямніцы ад ахвяр дамовілася аб пазасудовай зьдзелцы, і фінансіст атрымаў 1,5 гады турмы і дазвол рэгулярна адлучацца зь яе па справах. У 2019 годзе Эпштэйн быў зноў арыштаваны ФБР і пакончыў з сабой у турме, знаходзячыся пад арыштам. Яго саўдзельніца Гіслейн Максьвел была асуджаная ў 2021 годзе і адбывае 20-гадовы тэрмін.
У ходзе сваёй перадвыбарнай кампаніі Трамп абяцаў апублікаваць сьпіс кліентаў, якім Эпштэйн пастаўляў юных дзяўчат. У адпаведнасьці з кансьпіралягічнай вэрсіяй, якую распаўсюджваў Трамп і яго прыхільнікі, амэрыканскія ўлады схавалі гэтыя дадзеныя, паколькі сярод кліентаў Эпштэйна была маса высокапастаўленых фігур. Акрамя таго, існавала вэрсія, што Эпштэйн быў агентам спэцслужбаў — гэта тлумачыла ўсе цёмныя месцы ў яго біяграфіі, а самагубства ў турме ператваралася такім чынам у забойства, якое дазваляла закрыць справу і такім чынам абараніць кліентаў і заступнікаў Эпштэйна.
Пасьля абраньня Трамп прызначыў блогера-кансьпіролага Кэша Патэла, які распаўсюджваў гэтую вэрсію, кіраўніком ФБР, а прызначаная Трампам генпракурор Пэм Бондзі заявіла ў інтэрвію, што сьпіс кліентаў Эпштэйна ляжыць у яе на стале. Аднак у ліпені ФБР і Мінюст ЗША, ведамствы, якія ўзначальваюць Патэл і Бондзі, заявілі, што справа закрытая, ніякіх саўдзельнікаў у Эпштэйна не было, і ніякіх дадатковых матэрыялаў апублікавана не будзе. Гэта выклікала выбух незадаволенасьці сярод прыхільнікаў Трампа.
У адказ Трамп даручыў Пэм Бондзі дамагацца рассакрэчваньня пратаколаў вялікага журы па справах Эпштэйна і Максвел. Мінюст ужо падаў адпаведнае хадайніцтва, паабяцаўшы абараніць асабістыя зьвесткі ахвяраў.
Чакаецца, што нават пасьля магчымай публікацыі пратаколы вялікага журы будуць часткова адрэдагаваны і не раскрыюць усіх дэталяў. Такія матэрыялы могуць зьмяшчаць непацьверджаныя дадзеныя, не прызначаныя для судовага разбору.
Форум