«Адпаведна, палажэньні канвэнцыі не падлягаюць выкананьня датычна да даходаў, налічаным (выплачаным) з 6 красавіка 2025 году, а таксама да прыбытку за пэрыяды, пачынаючы з 1 красавіка 2025 году», — адзначаецца ў паведамленьні Міністэрства па падатках і зборах Беларусі.
Ўправа падатковых і мытных збораў Вялікай Брытаніі 6 лютага 2025 году паведаміла беларускі бок аб прыпыненьні дзеяньня канвэнцыі аб пазьбяганьні падвойнага падаткаабкладаньня.
Улады Вялікай Брытаніі ўхвалілі такое рашэньне ў адказ на дзеяньні Беларусі.
У сакавіку 2024 году Савет міністраў Беларусі прыняў пастанову № 164 «Аб пытаньнях падаткаабкладаньня», якая, сярод іншага, прыпыніла да канца 2026 году «выкананьне палажэньняў міжнародных пагадненьняў аб пазьбяганьні падвойнага падаткаабкладаньня» з 27 «недружалюбнымі краінамі». Гэта Аўстрыя, Баўгарыя, Бэльгія, Вялікая Брытанія, Вугоршчына, Гішпанія, Данія, ЗША, Ірляндыя, Італія, Кіпр, Латвія, Літва, Паўночная Македонія, Нідэрлянды, Нямеччына, Польшча, Румынія, Славаччына, Славенія, Фінляндыя, Францыя, Харватыя, Чэхія, Швайцарыя, Швэцыя, Эстонія. Пад абмежаваньні трапілі тры палажэньні пагадненьня — аб дывідэндах, аб працэнтах, а таксама аб даходах ад адчужэньня маёмасьці. Некаторыя краіны ў адказ прыпынілі адпаведнае пагадненьне зь Беларусьсю.
Форум