«Савет міністраў Беларусі зацьвердзіў пастанову, што вызначае парадак функцыянаваньня інфармацыйнай сыстэмы, якая дасьць магчымасьць дзяржаўным органам Расеі і Беларусі абменьвацца інфармацыяй у памежных пунктах пропуску і пацьвярджаць сапраўднасьць дакумэнтаў, якія пацьвярджаюць асобу, у тым ліку замежных грамадзян і асобаў без грамадзянства, якія пражываюць на тэрыторыі саюзнай дзяржавы. Гэтая сыстэма абмену зьвесткамі, імаверна, пашырыць магчымасьці расейскіх праваахоўных органаў у іхнай дзейнасьці ў Расеі», — адзначаецца ў справаздачы ISW за 4 красавіка.
Што папярэднічала
У 2017 годзе Беларусь і Расея падпісалі пратакол пра абмен зьвесткамі аб «невыязных» беларусах і расейцах, але абмен інфармацыяй аб іншаземцах ня быў унармаваны, хоць беларускія памежнікі адмаўлялі ім ува ўезьдзе — найперш грамадзянам Украіны.
З 11 студзеня 2025 году пачало дзейнічаць пагадненьне паміж Беларусьсю і Расеяй аб узаемным прызнаньні візаў. Цяпер іншаземцы зь беларускай візай могуць падарожнічаць у Расею, а з расейскай — у Беларусь, у тым ліку праз шэраг наземных пунктаў пропуску. Пры гэтым для ўкраінскіх грамадзян захоўваецца «асаблівы парадак уезду» у Расею — праз пункт пропуску ў маскоўскім аэрапорце Шарамецьева і аўтамабільны пункт пропуску Лудонка ў Пскоўскай вобласьці.
12 сакавіка 2025 году Аляксандр Лукашэнка падпісаў указ № 107 «Аб інфармацыйнай сыстэме абмену зьвесткамі аб замежных грамадзянах і асобах без грамадзянства», накіраваны на рэалізацыю беларуска-расейскага міжурадавага пагадненьня аб узаемным прызнаньні візаў. Указам прадугледжанае стварэньне інфармацыйнай сыстэмы абмену зьвесткамі аб перасячэньні мяжы ў пунктах пропуску, аб выдадзеных і сканфіскаваных (ці ануляваных) дакумэнтах на права ўезду і выезду (транзыту), а таксама пасьведчаньняў асобы замежных грамадзян і асобаў без грамадзянства на тэрыторыі «саюзнай дзяржавы». Такую сыстэму мелі стварыць да 1 красавіка.
4 сакавіка ўрад Беларусі зацьвердзіў палажэньне аб парадку функцыянаваньня інфармацыйнай сыстэмы абмену з Расеяй зьвесткамі аб іншаземцах. Яна пачынае дзейнічаць з 5 красавіка.
Форум