Савет міністраў Беларусі пастановай № 192 зацьвердзіў палажэньне аб парадку функцыянаваньня інфармацыйнай сыстэмы абмену з Расеяй зьвесткамі аб іншаземцах. Дакумэнт апублікавалі на Нацыянальным праўным інтэрнэт-партале.
Гэтая сыстэма прадугледжаная пагадненьнем паміж Беларусьсю і Расеяй аб узаемным прызнаньні візаў, якое пачало дзейнічаць у студзені 2025 году.
Сыстэма мае зьвесткі пра:
- дакумэнты для наведваньня міжнародных мерапрыемстваў;
- візы Беларусі і Расеі;
- ануляваныя візы Беларусі і Расеі;
- перасячэньне дзяржаўных межаў Беларусі і Расеі;
- дазволы на жыхарства ў Беларусі і Расеі;
- прызнаныя несапраўднымі дазволы на жыхарства ў Беларусі і Расеі;
- дазволы на часовае жыхарства ў Беларусі і Расеі;
- ануляваныя дазволы на часовае жыхарства ў Беларусі і Расеі;
- пастаноўку на міграцыйны ўлік і зьняцьце зь міграцыйнага ўліку ў Расеі;
- тэрміны рэгістрацыі, падаўжэньня часовага знаходжаньня, скарачэньня тэрміну часовага знаходжаньня ў Беларусі.
Карыстальнікі сыстэмы абмену з Расеяй зьвесткамі аб іншаземцах у Беларусі — МУС, МЗС, Дзяржаўны памежны камітэт, КДБ, Камітэт дзяржаўнага кантролю, Апэратыўна-аналітычны цэнтар і афіцыйны апэратар продажу квіткоў на спартовыя і культурныя імпрэзы.
- З 11 студзеня 2025 году пачало дзейнічаць пагадненьне паміж Беларусьсю і Расеяй аб узаемным прызнаньні візаў. Цяпер іншаземцы зь беларускай візай могуць падарожнічаць у Расею, а з расейскай — у Беларусь, у тым ліку праз шэраг наземных пунктаў пропуску. Пры гэтым для ўкраінскіх грамадзян захоўваецца «асаблівы парадак уезду» у Расею — праз пункт пропуску ў маскоўскім аэрапорце Шарамецьева і аўтамабільны пункт пропуску Лудонка ў Пскоўскай вобласьці.
- 12 сакавіка 2025 году Аляксандр Лукашэнка падпісаў указ № 107 «Аб інфармацыйнай сыстэме абмену зьвесткамі аб замежных грамадзянах і асобах без грамадзянства», накіраваны на рэалізацыю беларуска-расейскага міжурадавага пагадненьня аб узаемным прызнаньні візаў. Указам прадугледжанае стварэньне інфармацыйнай сыстэмы абмену зьвесткамі аб перасячэньні мяжы ў пунктах пропуску, аб выдадзеных і сканфіскаваных (ці ануляваных) дакумэнтах на права ўезду і выезду (транзыту), а таксама пасьведчаньняў асобы замежных грамадзян і асобаў без грамадзянства на тэрыторыі «саюзнай дзяржавы». Такую сыстэму мелі стварыць да 1 красавіка.
- У 2017 годзе Беларусь і Расея падпісалі пратакол пра абмен зьвесткамі аб «неўязных» беларусах і расейцах, але абмен інфармацыяй аб іншаземцах ня быў унармаваны, хоць беларускія памежнікі адмаўлялі ўва ўезьдзе найперш грамадзянам Украіны.
Форум