У Самаркандзе (Узбэкістан) прайшоў першы ў гісторыі саміт «Цэнтральная Азія — Эўразьвяз», які разглядаюць як новы ўзровень супрацоўніцтва Казахстана, Кіргізстану, Таджыкістану, Туркмэністану і Ўзбэкістану з эўрапейскімі краінамі.
Як паведаміла ўзбэцкае выданьне spot.uz, кіраўніцтва Эўразьвязу абвясьціла інвэстыцыйны пакет у межах праграмы «Глябальная брама» (Global Gateway) на 12 мільярдаў эўра для краін Цэнтральнай Азіі.
«Гэта сапраўды пачатак новай эры ў нашым даўнім сяброўстве», — заявіла прэзыдэнтка Эўракамісіі Урсуля фон дэр Ляен.
Інвэстыцыйны пакет будзе разьмеркаваны паміж чатырма сфэрамі: транспарт (3 мільярды эўра), крытычна важныя мінэралы (2,5 мільярда эўра), гідраэнэргія і клімат (6,4 мільярда эўра), спадарожнікавы інтэрнэт (100 мільёнаў эўра).
Прэзыдэнт Эўрапейскай рады Антонію Кошта заявіў, што Эўразьвяз імкнецца пабудаваць узаемавыгаднае партнэрства з Цэнтральнай Азіяй.
«Нашыя дачыненьні ніколі не былі настолькі трывалыя, і цяпер мы павінны рухацца наперад з амбіцыямі, каб напісаць наступныя разьдзелы стратэгічнага партнэрства паміж Цэнтральнай Азіяй і Эўрапейскім Зьвязам», — сказаў Антонію Кошта.
Паводле яго, першы саміт азначае пачатак «новага вымярэньня дачыненьняў», і ён ня будзе разавым мерапрыемствам.
Сярод патэнцыйных кірункаў супрацы прэзыдэнт Эўрапейскай рады назваў бясьпеку, кліматычныя зьмены, барацьбу з нарказлачыннасьцю і тэрарызмам.
Чаму гэта важна
Казахастан, Кіргізстан, Таджыкістан, Туркмэністан і Ўзбэкістан уваходзяць у склад Садружнасьці незалежных дзяржаў (СНД).
Пасьля расейскага ваеннага ўварваньня ва Ўкраіну краіны Цэнтральнай Азіі пачалі дапамагаць Расеі і Беларусі абыходзіць санкцыі, уведзеныя пасьля 24 лютага 2022 году.
Казахстан, Кіргізстан і Таджыкістан уваходзяць у склад Арганізацыі Дамовы аб калектыўнай бясьпецы (АДКБ), у якой дамінуе Расея.
Пасьля расейскага ваеннага ўварваньня ва Ўкраіну краіны Цэнтральнай Азіі пачалі дапамагаць Расеі і Беларусі абыходзіць санкцыі, уведзеныя пасьля 24 лютага 2022 году.
Сёлета ў сярэдзіне кастрычніка ў Кіргізстане арганізуюць апэратыўны збор з камандаваньнем і камандна-штабнае вучэньне з падразьдзеламі калектыўных сіл хуткага разгортваньня Цэнтральнай Азіі «Рубеж-2025», а ў другой палавіне кастрычніка ў Таджыкістане правядуць вучэньні зь міратворчымі сіламі «Непарушнае братэрства-2025», якія зьвяжуць з антытэрарыстычнымі вучэньнямі СНД «Садружнасьць-Антытэрор-2025».
У верасьні на тэрыторыі Беларусі адбудуцца вайсковыя вучэньні АДКБ «Узаемадзеяньне-2025», «Пошук-2025» і «Эшалон-2025», якія зьвяжуць з задумам стратэгічных расейска-беларускіх вучэньняў «Захад-2025».
Форум