Пра гэта паведамляе выданьне Reform.news.
«Працягвайце выдаваць міжнародную абарону і дазволы на жыхарства шчырым беларусам. На жаль, многія беларусы ня могуць вярнуцца дадому і застаюцца без дакумэнтаў. Бацькі ня могуць аформіць нованароджаных дзяцей. У Літве ёсьць выдатнае рашэньне — пашпарт іншаземца, і мы просім спрасьціць і пашырыць практыку яго выдачы. А наш пашпарт, які мы плянавалі выдаваць, мы перанясем у тыя краіны, дзе праблема з дакумэнтамі ніяк ня вырашаная», — заявіла Ціханоўская.
Нагадаем, праект «пашпарту Новай Беларусі» быў анансаваны ў жніўні 2023 году на канфэрэнцыі «Новай Беларусі». Афіцыйна яго прэзэнтавалі сёлета ў студзені. У Літве быў створаны Беларускі пашпартны цэнтар, які мусіў заняцца выдачай такога дакумэнту. Ішла праца для прызнаньня пашпарту. Аднак літоўскія дзяржаўныя органы паведамілі, што ня будуць прызнаваць яго.
Шэраг літоўскіх палітыкаў абурыліся выкарыстаньнем у афармленьні пашпарту гербу «Пагоня». Яны заявілі, што на пашпарце выяўлены дзяржаўны герб Літвы, і папрасілі МЗС Літвы разабрацца ў сытуацыі. Прэзыдэнт Літвы Гітанас Наўседа і МЗС Літвы заявілі, што ня бачаць праблемы ў выкарыстаньні «Пагоні».
У лютым сёлета амаль 70 грамадзкіх дзеячоў Літвы накіравалі ліст прэзыдэнту Гітанасу Наўседу, у Міністэрства замежных справаў і ў Сейм з заклікам забараніць выкарыстаньне сымбалю «Пагоня» як на пашпартах, якія зьбіраюцца выпускаць беларускія дэмакратычныя сілы, гэтак і ў кожнай іншай форме ў афіцыйным кантэксьце.
Форум