Згодна з дакумэнтам, ліцэнзію патэнцыйнаму імпартэру будзе выдаваць Міністэрства антыманапольнага рэгуляваньня і гандлю па ўзгадненьні з канцэрнам «Беллегпрам».
Пры атрыманьні такой ліцэнзіі заяўнік павінен пацьвердзіць, што айчынныя гарбарныя арганізацыі канцэрну «Беллегпрам» адмаўляюцца або ня могуць выпусьціць і паставіць аналягічны тавар на тых жа ўмовах, што і замежныя. У лік гэтых арганізацый «Беллегпраму» ўваходзяць «Бабруйскі гарбарны камбінат», «Менскае вытворчае гарбарнае аб’яднаньне», «СКІНТЭХ», «Горадзенскае вытворчае гарбарнае аб’яднаньне».
У выдачы ліцэнзіі могуць адмовіць, калі заяўнік падаў дакумэнты, якія не адпавядаюць патрабаваньням, ці калі выявіцца, што «патэнцыйны пастаўшчык тавараў не зьяўляецца іх вытворцам».
Ліцэнзаваньне распаўсюджваецца на тавары, якія ўвозяць як з краін Эўразійскага эканамічнага саюзу, так з-за межаў ЭАЭС.
Патрабаваньне не распаўсюджваецца на тавары, якія
- перамяшчаюцца транзытам;
- увозяць у якасьці замежнай бязвыплатнай дапамогі;
- тавары, выраблены ў краінах Эўразійскага эканамічнага саюза (пры наяўнасьці сэртыфікату паходжаньня).
Большасьць пунктаў пастановы набываюць моц з 9 сакавіка, яна будзе дзейнічаць цягам 6 месяцаў.
- У 2021 годзе на працягу паўгода ў Беларусі таксама дзейнічала ліцэнзаваньне імпарту гатовых скур са шкур буйной рагатай жывёлы.
- У кастрычніку 2024 году Беллегпрам прапанаваў вярнуць часовае ліцэнзаваньне на імпарт скуры, бо спажываньне айчыннай скуры ў Беларусі нізкае — каля 43% ад вырабленага, а абутковыя кампаніі «Белвест» і «Марка» толькі ў 30% выпадкаў карыстаюцца беларускай скурай. У Беллегпраме тады адзначылі, што ў 2024 годзе загрузка гарбарных заводаў складала толькі каля 85%. Дырэктар Беларускай асацыяцыі прадпрыемстваў лёгкай прамысловасьці Дзьмітры Сарнацкі тады прапанаваў спачатку абмеркаваць пытаньне «з усімі зацікаўленымі бакамі», бо вытворцам гатовай прадукцыі патрэбная скура «павышанай якасьці і трэндавых колераў, а айчынныя гарбарні не заўсёды могуць даць патрэбную сыравіну».
Форум