Азэрбайджан праводзіць падрыхтоўчыя работы для звароту ў міжнародны суд у сувязі з крушэньнем самалёта AzAl, які ляцеў у Грозны, паведаміла 6 лютага адно з найбуйнейшых азэрбайджанскіх агенцтваў APA, якое зьвязваюць з азэрбайджанскімі ўладамі.
У матэрыяле гаворыцца, што пасьля публікацыі папярэдняй справаздачы Міністэрства транспарту Казахстану аб крушэньні самалёта «Азэрбайджанскіх авіяліній» расейскі бок «працягвае перадузята камэнтаваць здарэньне».
Паводле справаздачы, агляд выявіў шматлікія прабоіны і пашкоджаньні ў розных частках самалёта, якія ўзьніклі «ў выніку ўзьдзеяньня староньніх аб’ектаў», пры гэтым прыкметаў сутыкненьня з птушкамі ня выяўлена.
«Нягледзячы на гэтыя факты, расейскія афіцыйныя асобы, экспэрты і СМІ «працягваюць адмаўляць сваё дачыненьне да інцыдэнту і спрабуюць ускласьці віну на экіпаж. Падобная тактыка нагадвае сытуацыю з малайзійскім Boeing 777, зьбітым у 2014 годзе над Данбасам, за што Масква да гэтага часу не прызнала адказнасьці», — гаворыцца ў публікацыі.
Паводле зьвестак агенцтва, агонь па самалёце быў адкрыты з тэрыторыі вайсковай часткі ў пасёлку Ханкала (частка Грознага). У публікацыі адзначаецца, што азэрбайджанскія ўлады маюць зьвесткі пра асобаў, якія аддалі загад і адкрылі агонь, а таксама пра тып зброі, таму спробы Расеі «накіраваць расьсьледаваньне ў іншае рэчышча і ўскласьці віну на экіпаж», нягледзячы на наяўнасьць усіх гэтых фактаў і доказаў, «выклікаюць глыбокае шкадаваньне», гаворыцца ў публікацыі.
«Азэрбайджан дакладна акрэсьліў свае ўмовы і патрабаваньні, якія былі агучаныя на вышэйшым узроўні. Як ужо адзначалася, у распараджэньні Азэрбайджану знаходзяцца фрагмэнты ракеты „Pantsir-S“, якою быў зьбіты самалёт. Фармуецца доказная база, зьбіраюцца факты і доказы, вядзецца падрыхтоўка да звароту ў міжнародны суд.
Аднак дзьверы для дыялёгу з Расеяй адкрытыя. Масква павінна адкрыта прызнаць сваю віну і ўзяць на сябе адказнасьць. У адваротным выпадку Баку гатовы да далейшых крокаў», — гаворыцца ў публікацыі.
- Самалёт «Азэрбайджанскіх авіяліній» 25 сьнежня 2024 году выконваў рэйс з Баку ў Грозны. На борце былі 67 чалавек. 38 зь іх, у тым ліку трое чальцоў экіпажу, загінулі ў выніку крушэньня пад Актаў. Расьсьледаваньне працягваецца, але асноўнай вэрсіяй авіякатастрофы называюць пашкоджаньне фюзэляжа паражальнымі элемэнтамі зэнітнай ракеты ў небе над Грозным.
- Прэзыдэнт Азэрбайджану Ільхам Аліеў заявіў, што Баку ня лічыць пашкоджаньне лайнэра наўмысным, але адказнасьць за катастрофу «ляжыць на прадстаўніках Расейскай Фэдэрацыі». Аліеў запатрабаваў ад Расеі прызнаць віну і пакараць вінаватых.
- Прэзыдэнт Расеі Ўладзімір Пуцін выбачыўся за катастрофу азэрбайджанскага самалёта, але адказнасьці за яе не прызнаў.
Форум