Адпаведны ўказ Лукашэнка падпісаў 5 лютага.
За кошт сродкаў праграмы ў 2025 годзе будуць будавацца і рэканструявацца, сярод іншага, аўтамабільныя дарогі М10 (Гомель — Кобрын), М3 (Менск — Віцебск), Р46 (Лепель — Полацак), Р53 (Слабада — Навасады) і масты цераз рэкі Прыпяць (у Мазыры) і Сож (на аўтадарозе Р30 Гомель — Ветка — Чэрыкаў).
Да падзеяў 2020 году аўтадарогі ў Беларусі будаваліся і рэканструяваліся ў значнай ступені з дапамогай сродкаў Эўрапейскага Зьвязу ў рамках праграмы «Ўсходняе партнэрства».
У 2021 годзе тагачасны аналітык Цэнтру эўрапейскай трансфармацыі Андрэй Ягораў тлумачыў у інтэрвію Радыё Свабода, што ў рамках «Ўсходняга партнэрства» існавалі праграмы з уключэньнем дарог Беларусі ў сыстэму ключавых транспартных артэрыяў Эўразьвязу, так званыя TEN-T. Там Беларусь атрымлівала інвэстыцыйныя праекты, рэалізоўваць якія дапамагаў Эўрапейскі банк рэканструкцыі і разьвіцьця або іншыя фінансавыя інстытуты. За гэтыя грошы, напрыклад, аднаўлялася дарога М7. (Праект на суму 110 млн эўра ад Эўрапейскага інвэстыцыйнага банку быў прыпынены ўвесну 2021-га ў сувязі з палітычным крызісам у Беларусі. — РС).
ЭБРР выдзяляў грошы на рэканструкцыю 12 мастоў. У інфраструктуру дарог зьбіраліся інвэставаць больш за 250 мільёнаў даляраў. Калі браць сродкі, якія выдзяляліся Эўрапейскім інвэстыцыйным банкам і ЭБРР, то сума даходзіла б да 500 мільёнаў на год.
Што такое «Ўсходняе партнэрства»
- «Усходняе партнэрства» — праект ЭЗ, які мае на мэце разьвіцьцё інтэграцыйных сувязяў з постсавецкімі краінамі: Азэрбайджанам, Армэніяй, Беларусьсю, Грузіяй, Малдовай і Ўкраінай.
- Беларускія ўлады прыпынілі ўдзел ва «Ўсходнім партнэрстве» ў чэрвені 2021 году ў адказ на новыя заходнія санкцыі, уведзеныя пасьля вымушанай пасадкі ў Менску самалёта ірляндзкай авіякампаніі Ryanair, які ляцеў з Атэнаў у Вільню, і арышту на той момант апазыцыйнага блогера Рамана Пратасевіча і ягонай партнэркі, грамадзянкі Расеі Соф’і Сапегі.
Форум