30 студзеня Руандыйская агенцыя вяшчаньня апублікавала фота захопленай паўстанцамі з групоўкі М23 у аэрапорце Гомы (найбуйнейшы горад на ўсходзе Дэмакратычнай Рэспублікі Конга) вайсковай тэхнікі, у тым ліку ўпакаваных у драўляныя скрыні новых БПЛА. Яны неадрозныя ад бесьпілётнага лятальнага апарата «Беркут-ВМ» беларускай вытворчасьці, заўважыла выданьне Reform.
На фота відаць, што ўнутры адной са скрыняў знаходзіцца бесьпілётнік з рэактыўным рухавіком. Крылы здымаюцца і спакаваныя асобна. На дне ляжыць кніжачка з надпісам на расейскай мове «Этыкетка» і подпісам. Усяго ў ангары можна заўважыць каля 20 зялёных скрыняў з новымі БПЛА.
Аналягічны апарат паказаў тэлеканал Мінабароны Беларусі ў траўні 2020 году. Выраб шмат разоў дэманстравалі публічна, на выставах, у тым ліку прэзэнтавалі Аляксандру Лукашэнку.
«Беркут-ВМ» — беларускі бесьпілётнік, распрацаваны канструктарскім бюро «Індэла». Першапачаткова гэта была паветраная мішэнь, здольная імітаваць крылатую ракету і транспартны самалёт.
Раней у СМІ была інфармацыя аб пастаўках бесьпілётніка ў Анголу ў лютым 2019 году.
Што адбываецца ў ДРК?
У панядзелак, 27 студзеня, паўстанцкая групоўка «Рух 23 сакавіка» (M23), якая прадстаўляе інтарэсы этнічнай меншасьці тутсі, пры падтрымцы вайскоўцаў з суседняй Руанды ўстанавіла кантроль над Гомай, найбуйнейшым горадам на ўсходзе ДРК. Быў захоплены мясцовы аэрапорт, дзе захоўвалася вайсковая тэхніка.
Дэмакратычная Рэспубліка Конга (колішні Заір) знаходзіцца ў стане ўзброенага канфлікту ўжо больш за 30 гадоў, з часоў генацыду ў Руандзе ў 1994 годзе. «Рух 23 сакавіка» называюць яшчэ «Кангалескай рэвалюцыйнай арміяй». Назву рух мае ў гонар 23 сакавіка 2009 году, калі паўстанцкі «Нацыянальны кангрэс у абарону людзей» (CNDP) падпісаў мірнае пагадненьне з урадам ДРК. Той дакумэнт уключаў пункты аб вызваленьні палітвязьняў, ператварэньне CNDP зь мілітарнага руху ў палітычную партыю, рэінтэграцыю ўцекачоў і прыём сяброў CNDP ва ўрадавыя інстытуцыі і войска ДРК.
Аднак пагадненьне выклікала незадаволенасьць мясцовага насельніцтва, якое вінаваціла паўстанцаў у ваенных злачынствах. Рэальны матыў далучэньня шэрагу паўстанцаў да ўрадавых войскаў праваабаронцы расцанілі як імкненьне кантраляваць пастаўкі мінэралаў. M23 узьнік у 2012 годзе і спачатку налічваў у сваіх шэрагах 300 жаўнераў. Рух абвінаваціў урад ДРК у няздольнасьці выканаць умовы пагадненьня сакавіка 2009 году, раскрытыкаваў умовы ва ўрадавым войску і абвясьціў далейшае супрацьстаяньне ўраду краіны. Кіраўнік мілітарнага крыла арганізацыі — палкоўнік Султані Макенга — знаходзіцца пад санкцыямі ЗША за злачынствы супраць цывільных асобаў.
Суседняя Руанда, дзе самых тутсі перасьледавалі хуту, што прывяло да генацыду і бежанства ў 1994 годзе, падтрымлівала М23. Аднак у 2013 годзе пасьля паразаў на полі бою і крытыкі ААН краіна прыпыніла падтрымку паўстанцаў. Аднак празь нейкі час, як паказвалі справаздачы праваабаронцаў, афіцыйны Кігалі аднавіў сваё спрыяньне паўстанцам.
Форум