Зь ініцыятываў выступіла група сэнатараў. Ва ўхваленым дакумэнце Сэнат падкрэсьлівае, што «незалежнасьць Беларусі зьяўляецца бясспрэчнай каштоўнасьцю, надзвычай важнай для стабільнай будучыні рэгіёну і ўсёй Эўропы, і Беларусь ня можа стаць такой імпэрскім трафэем Расеі».
«Сэнат выказвае перакананьне, што ў будучыні Беларусь далучыцца да сям’і дэмакратычных эўрапейскіх дзяржаў».
Сэнатары, сярод іншага,
- канстатуюць адсутнасьць умоў і інстытуцыянальнай базы для правядзеньня свабодных і справядлівых выбараў у Рэспубліцы Беларусь на сёньняшні дзень;
- што прэзыдэнцкія выбары былі прызначаныя за 6 месяцаў да даты іх законнага правядзеньня;
- усе апазыцыйныя партыі, незалежныя прафсаюзы і арганізацыі грамадзянскай супольнасьці былі закрыты, незалежныя СМІ забароненыя,
- што ў цяперашні час у турмах знаходзіцца больш за 1300 палітычных зьняволеных, якія павінны быць неадкладна вызваленыя;
- не былі забясьпечаны ўмовы для бясьпечнага захоўваньня бюлетэняў і празрыстага падліку галасоў, а асобы ўсіх сябраў выбарчых камісій былі засакрэчаныя;
- не дапускаюць незалежных назіральнікаў, а людзей, якія назіралі за папярэднімі выбарамі або падтрымлівалі апазыцыйных кандыдатаў, перасьледуюць.
«Таму Сэнат лічыць, што выбары 26 студзеня 2025 года будуць толькі спробай легітымізацыі дыктатуры і іх вынікі ня могуць быць прызнаныя міжнароднай супольнасьцю. Мы заяўляем пра гатоўнасьць супрацоўнічаць з прадстаўнікамі беларускай грамадзянскай супольнасьці, у прыватнасьці з Каардынацыйнай радай па перадачы ўлады ў Беларусі, якую мы разглядаем як беларускі парлямэнт у выгнаньні», — запісана ў рэзалюцыі.
Выбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Паводле заканадаўства, сёмыя прэзыдэнцкія выбары ў Беларусі павінны былі адбыцца не пазьней за 20 ліпеня 2025 году.
- Аляксандар Лукашэнка адразу ж заявіў пра намер працягнуць сваю ўладу над краінай яшчэ прынамсі на 5 гадоў. Гэтыя выбары сталі сёмымі для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада пасьля гэтага выпусьцілі сумесную заяву, у якой падкрэсьлілі, што электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Гэтыя выбары ў Беларусі пры Лукашэнку насілі, паводле міжнародных арганізацый, несвабодны і недэмакратычны характар. Выбарчая кампанія праходзіла ва ўмовах шырокамаштабных рэпрэсій і палітычнага крызісу, які цягнецца ад папярэдніх прэзыдэнцкіх выбараў 2020 году. 97% членаў выбаркамаў працавала на папярэдніх выбарах, вынікае з дакладу ініцыятывы былых сілавікоў BelPol.
- Паводле ЦВК, яўка на выбарах склала 86,82%. Ужо ў ноч на 27 студзеня Цэнтральная выбарчая камісія заявіла, што за Лукашэнку прагаласавалі 86,82% выбарнікаў. 3 лютага ў ЦВК заявілі, што згодна з канчатковымі вынікамі Аляксандар Лукашэнка атрымаў 5 136 293 галасы (86,82%), Сяргей Сыранкоў — 189 740 галасоў, Алег Гайдукевіч — 119 272 галасы, Ганна Канапацкая — 109 760 галасоў, Аляксандар Хіжняк — 102 789 галасоў.
- У Эўрапарлямэнце 22 студзеня ўхвалілі рэзалюцыю, у якой заклікалі не прызнаваць прэзыдэнцкія выбары 26 студзеня і легітымнасьць Лукашэнкі. Праваабаронцы Libereco і «Вясны» назвалі выбары ў Беларусі «прапагандысцкім шоў», Міжнародны інстытут дэмакратыі і садзейнічаньня выбарам — «„самапрызначэньнем“ Лукашэнкі», а гендакладчык ПАРЭ па дэмакратычнай Беларусі Рышард Пэтру заявіў, што яны «стануць чарговай фікцыяй». У Amnesty International адзначылі ўзмацненьне палітычных рэпрэсій перад выбарамі.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не прызнала міжнародная супольнасьць, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі. Палітычны крызіс, які ўзьнік пасьля выбараў 2020 году ў Беларусі, і шырокамаштабныя рэпрэсіі ў краіне працягваюцца дагэтуль. У сувязі з пагрозай палітычнага перасьледу Беларусь пасьля 2020 году, паводле розных ацэнак, пакінулі сотні тысяч беларусаў. У Беларусі ліквідавалі амаль амаль усе палітычныя партыі, грамадзкі сэктар краіны, пачынаючы з пасьлявыбарчага пэрыяду 2020 году, страціў больш за 1,8 тысячы некамэрцыйных арганізацыяў. Пасьля выбараў 2020 году ў Беларусі прызналі «экстрэмісцкімі фармаваньнямі/арганізацыямі» і заблякавалі практычна ўсе незалежныя СМІ, журналісты гэтых мэдыя сутыкнуліся з затрыманьнямі, адміністрацыйным і крымінальным перасьледам, многія вымушана пакінулі краіну і працягнулі працаваць з-за мяжы.
Форум