У Руандзе зафіксавалі ўспышку небясьпечнага вірусу Марбург. Сусьветная арганізацыя здароўя прапярэдзіла пра рызыку распаўсюджваньня сьмяротнай, невылечнай хваробы, выкліканай вірусам. 2 кастрычніка на вакзале Гамбурга перакрылі некалькі шляхоў праз падазрэньне заражэньне вірусам пасажыра.
Успышка вірусу Марбург, пра якую улады Руанды паведамілі 27 верасьня, у першую чаргу закранула мэдыцынскіх работнікаў. Па стане на 1 кастрычніка, улады Руанды пацьвердзілі 29 выпадкаў заражэньня і 10 сьмерцяў. 19 чалавек цяпер знаходзяцца на ізаляцыі, больш за 290 кантактаў былі выяўленыя і адсочваюцца органамі аховы здароўя.
На сайце Сусьветнай арганізацыі здароўя адзначаецца, што гэта першая ў гісторыі Руанды ўспышка хваробы, выкліканая вірусам Марбург. Выпадкі заражэньня зарэгістраваныя ў сямі з 30 раёнаў краіны.
У САЗ паведамілі, што каардынуюць намаганьні па ўзмацненьні сумесных трансгранічных мераў гатоўнасьці і рэагаваньня ў суседніх з Руандай краінах, каб забясьпечыць своечасовае выяўленьне і кантроль над вірусам, каб прадухіліць яго далейшае распаўсюджваньне.
Тым часам выданьне Mirror піша, што асьцярогі спэцыялістаў выклікае той факт, што адзін падазраваны ў заражэньні чалавек пакінуў Руанду. Акрамя таго, паходжаньне вірусу і спосабы яго распаўсюджваньня невядомыя. Таксама не існуе спэцыфічнага лекаваньня і вакцыны ад гэтай інфэкцыі.
2 кастрычніка стала вядома, што на вакзале Гамбурга (Нямеччына) паліцыя перакрыла некалькі шляхоў праз падазрэньне на заражэньне вірусам Марбург, паведамляе BILD. Пасажырам давялося пакінуць плятформы.
Паведамляецца, што хворы — студэнт-мэдык з Руанды. Ён зь сяброўкай сеў на цягнік ICE у Франкфурце-на-Майне, які накіроўваўся ў Гамбург. Падчас паездкі ў яго зьявіліся сымптомы, падобныя да грыпу. Да гэтага студэнт прыляцеў у Нямеччыну прамым рэйсам з Руанды, дзе ён лекаваў пацыента, інфікаванага вірусам Марбург.
Вірус Марбург (Marburgvirus) адносіцца да сямейства Filoviridae, як і вірус Эбола, але лічыцца яшчэ больш небясьпечным. Хвароба, выкліканая вірусам, выклікае гемарагічную ліхаманку з узроўнем сьмяротнасьці да 88%. Захворваньне, выкліканае вірусам Марбург, пачынаецца рэзка, з высокай тэмпэратуры, моцнага галаўнога болю і моцнага недамаганьня. У многіх пацыентаў на працягу сямі дзён разьвіваюцца сур'ёзныя сымптомы гемарагіі.
Форум