Такі камэнтар місіі Ірана ў ААН ад 29 чэрвеня прыйшоў на фоне асьцярог перад больш шырокай рэгіянальнай вайной з удзелам Ізраіля і радыкальнай групоўкі «Хезбала» ў Лібане, якую падтрымлівае Іран.
Абодва бакі амаль штодня вядуць перастрэлкі з пачатку вайны ў сэктары Газа.
Ізраільскія вайскоўцы заявілі, што пляны нападу на Лібан «зацьверджаны і пацьверджаны», на што «Хезбала» адказала, што ніхто ў Ізраілі не будзе пашкадаваны ў поўнамаштабным канфлікце.
Раней камандуючы Паўночнай ваеннай акругай Арміі абароны Ізраіля генэрал Оры Гордын і кіраўнік Апэратыўнага ўпраўленьня Генштаба Адэд Басюк раней правялі ацэнку ваеннай сытуацыі і зацьвердзілі пляны наступу ізраільскага войска на тэрыторыі Лібана. Камандаваньне таксама прыняло рашэньне аб паскораным прывядзеньні войскаў у баявую гатоўнасьць.
Гэтыя паведамленьні зьявіліся ў той час, калі пачасьціліся напады радыкальнай групоўкі «Хезбала» і саюзных ёй палестынскіх ваенізаваных атрадаў у паўночных раёнах Ізраіля.
Ізраіль раней папярэджваў, што ня можа больш трываць прысутнасьць «Хезбалы» ля сваіх межаў у сьвятле яшчэ памятных жорсткіх актаў гвалту 7 кастрычніка мінулага году.
Ізраільскія ўлады выступілі зь перасьцярогай, што ў выпадку няўдачы дыпляматычных намаганьняў дзеля спыненьня ўзброенага супрацьборства, Армія абароны Ізраіля пачне ваенную апэрацыю, каб адціснуць «Хезбалу» ў паўночным кірунку.
Вайна ў сэктары Газа пачалася ў кастрычніку, калі баевікі групоўкі «Хамас», якую ЗША і Эўрасаюз уключылі ў сьпіс тэрарыстаў, напалі на поўдзень Ізраіля.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум