У аўтобусе, які трапіў у аварыю, былі грамадзяне Беларусі і Ўкраіны.
Аўтобус, які рухаўся трасаю S2, выяжджаючы на S79, зьехаў з дарогі, урэзаўся ў агароджу і перакуліўся. У аўтобусе знаходзіліся 27 чалавек (26 пасажыраў і кіроўца), паведамляе Rzeczpospolita. На месца здарэньня накіравалі пажарнікаў і брыгады хуткай мэдычнай дапамогі.
Пакуль ратаўнікі і мэдыкі працавалі на месцы аварыі, здарылася другая аварыя: грузавік урэзаўся ў заднюю частку пажарнай машыны, яе кіроўцу заціснула ў кабіне.
Агулам у дзьвюх аварыях, паводле папярэдніх зьвестак польскіх СМІ, пацярпелі ад 14 да 17 чалавек. Паводле выданьня Rzeczpospolita, 12 чалавек пацярпелі ў выніку аварыі аўтобуса, двое — у выніку наезду грузавіка на пажарную машыну, адзін з пацярпелых — пажарнік-кіроўца. Паводле выданьня Miejski Reporter, у выніку двух інцыдэнтаў пацярпелі 17 чалавек.
Стан двух пацярпелых ацэньваюць як цяжкі. Усіх пацярпелых шпіталізавалі.
Паводле СМІ, у аўтобусе знаходзіліся грамадзяне Ўкраіны і Беларусі. Колькі менавіта беларусаў было сярод іх, невядома.
З прычыны аварый цалкам заблякаваны рух трасаю S2 ад разьвязкі Пулаўска ў бок аэрапорта. Рух у зваротным кірунку працягваецца ў звычайным рэжыме.
Прэс-сакратар МУС і адміністрацыі Польшчы Яцэк Дабжыньскі пазьней паведаміў, што ў шпіталі даставілі 16 чалавек: 12 чалавек з аўтобуса, кіроўцаў грузавіка і пажарнай машыны і аднаго ратаўніка.
На станцыі хуткай дапамогі, куды даставілі пацярпелых, сказалі, што сярод пацярпелых у аўтобусе ў асноўным грамадзяне Ўкраіны і толькі адзін беларус.
«17 пацярпелых, у тым ліку 15 пасажыраў аўтобуса ва ўзросьце ад 17 да 59 гадоў, сярод якіх грамадзяне Ўкраіне, адзін беларус, адзін гішпанец і трое палякаў, а таксама пажарнік і 48-гадовы кіроўца грузавіка», — гаворыцца ў паведамленьні ў сетцы Х.
Адзначаецца, што ў асноўным у пацярпелых дыягнаставалі траўмы галавы, грудной клеткі, а таксама рук і ног.
У МЗС Беларусі заявілі, што ведаюць пра аварыю і цяпер высьвятляюць падрабязнасьці.
«Беларускія дыпляматы ў курсе сытуацыі, накіраваныя адпаведныя запыты ў польскія кампэтэнтныя органы, інфармацыя аб наяўнасьці сярод пацярпелых у выніку ДТЗ у Варшаве беларусаў удакладняецца», — паведамілі БЕЛТА ў МЗС Беларусі.
Форум