На сустрэчы ў Міністэрстве абароны Беларусі Віктар Хрэнін заявіў, што візыт расейскага міністра ў Беларусь зьяўляецца чарговым пацьверджаньнем «братэрскіх сувязяў і стратэгічнага партнэрства Беларусі і Расеі».
«Гэта асабліва важна ў вельмі складаных умовах ваенна-палітычнай абстаноўкі, якая складаецца вакол нашых краін», – сказаў Віктар Хрэнін.
Міністар абароны Расеі Андрэй Белавусаў у сваю чаргу назваў Беларусь «верным хаўрусьнікам і надзейным партнэрам Расеі» і заявіў аб неабходнасьці дадатковых захадаў бясьпекі для «саюзнай дзяржавы».
«Сёньня як ніколі неабходныя наша цесная супраца для своечасовага рэагаваньня на ваенна-палітычную абстаноўку і ўхваленьня дадатковых захадаў у гарантаваньні бясьпекі саюзнай дзяржавы», – працытавала Андрэя Белавусава прэсавая служба Міністэрства абароны Беларусі.
Міністар абароны Расеі Андрэй Белавусаў, які на гэтай пасадзе нядаўна зьмяніў Сяргея Шайгу, прыбыў у Менск раніцай 24 траўня, каб перад сустрэчай Аляксандра Лукашэнкі і Ўладзіміра Пуціна правесьці перамовы зь міністрам абароны Беларусі Віктарам Хрэніным.
Віктар Хрэнін сустрэў свайго расейскага калегу на вайсковым аэрадроме ў Мачулішчах.
«У Менску міністры правядуць працоўную сустрэчу. На парадку дня пытаньні двухбаковай вайсковай і вайскова-тэхнічнай супрацы», – паведамілі ў прэсавай службе Міністэрства абароны Беларусі.
Гэта першы візыт у Беларусь расейскага міністра.
Напярэдадні позна ўвечары Аляксандра Лукашэнка і Ўладзімір Пуцін абмеркавалі пытаньні «бясьпекі» і правядзеньне другой фазы вучэньня сродкаў і носьбітаў ядзернай зброі.
«Я думаю, што, як звычайна, мы пытаньні бясьпекі [вынесем] на першы плян, а заўтра абмяркуем эканамічныя пытаньні разам з нашымі калегамі з урадаў», — заявіў Лукашэнка позна ўвечары 23 траўня.
«Усё ў нас стабільна, усё складаецца добра. Пагаворым, вядома, і пра вучэньні — пра другую фазу вучэньняў, гэта зьвязана зь непасрэдным удзелам у гэтых мерапрыемствах нашых беларускіх сяброў, калег у вайсковай сфэры. Увогуле, у нас вельмі вялікі парадак дня», — адказаў яму Ўладзімір Пуцін.
Форум