Пагадненьне, падпісанае амбасадарамі ў Брусэлі, дасьць магчымасьць папоўніць Эўрапейскі фонд міру (ЭФМ) яшчэ 5 мільярдамі эўра да канца году, што стане дапаўненьнем да 6,1 мільярда эўра, выдзеленых з пачатку 2022 году.
Пра гэта паведамляе Euronews.
ЭФМ атрымаў шырокую вядомасьць адразу пасьля поўнамаштабнага ўварваньня Расеі ва Ўкраіну: краіны-чальцы ЭЗ пасьпяшаліся даць Кіеву вайсковую тэхніку, якая захоўвалася ў іх нацыянальных запасах.
Фонд часткова кампэнсуе выдаткі на гэтыя ахвяраваньні, дазваляючы ўсім краінам, ад самых буйных да самых маленькіх, унесьці свой уклад і аказаць дапамогу. Гэта «пазабюджэтная» схема, паколькі бюджэт ЭЗ ня можа фінансаваць выдаткі, якія ідуць на ваенныя дзеяньні.
Але ў 2023 годзе ЭФМ пачаў «губляць абароты»: запасы паступова скончыліся, а ўрады перайшлі ад калектыўных ахвяраваньняў Украіне да двухбаковых. Праца фонду была фактычна паралізаваная ў траўні, калі Вугоршчына наклала вэта ў адказ за ўнясеньне Кіевам вугорскага OTP Bank у сьпіс «міжнародных спонсараў вайны».
Празь некалькі месяцаў пасьля інтэнсіўнага дыпляматычнага ціску гэты статус быў зьняты, але Будапэшт працягваў перашкаджаць выдзяленьню новага траншу ў памеры 500 млн эўра для папаўненьня мэханізму.
Тым часам пачаліся дэбаты аб рэфармаваньні ЭФМ, каб зрабіць яго больш эфэктыўным, больш прадказальным і лепшым для патрэбаў Украіны.
Аднак перамовы заблыталіся ў палітычных супярэчнасьцях і зацягнуліся даўжэй, чым чакалася: Нямеччына настойвала на выліку «натуральных унёскаў» (двухбаковых ахвяраваньняў) з чаканага ўнёску краіны, а Францыя, падтрыманая Грэцыяй і Кіпрам, патрабавала, каб ЭФМ выкарыстоўваўся выключна для закупу зброі, вырабленай унутры Зьвязу.
Дэбаты ў Брусэлі рэзка кантраставалі з падзеямі на полі бою: у лютым украінскія войскі былі вымушаныя адступіць з усходняга гораду Аўдзееўка, што стала невялікай, але стратэгічнай перамогай Расеі. Няўдачу шмат хто наўпрост зьвязаў са скарачэньнем вайсковых паставак заходнімі саюзьнікамі, асабліва ЗША, дзе пакет падтрымкі ў памеры 60 мільярдаў даляраў завяз у двухпартыйнай барацьбе.
Усё гэта падштурхнула прадстаўнікоў краінаў-чальцоў ЭЗ да пошуку разьвязаньня.
Канкрэтныя дэталі пагадненьня, дасягнутага ў сераду, сталі вядомыя не адразу.
Глыбокі разрыў у аб’ёмах дапамогі, якая прадстаўляецца краінамі-чальцамі, спарадзіў спрэчкі: паводле дадзеных Кільскага інстытуту, Нямеччына ўзначальвае сьпіс донараў з 17,7 млрд эўра, за ёй ідуць Данія з 8,4 млрд эўра і Нідэрлянды з 4,4 млрд эўра.
Наадварот, тры найбуйнейшыя краіны ЭЗ плятуцца ў хвасьце: Італія — 670 млн эўра, Францыя — 640 млн эўра, Гішпанія — 330 млн эўра. Парыж аспрэчыў мэтодыку інстытуту і сьцьвярджае, што ягоныя двухбаковыя ахвяраваньні складаюць 2,61 млрд эўра, што ўсё роўна значна менш за нямецкі паказчык.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
