Паўночнаатлянтычны альянс пачынае 22 студзеня найбуйнейшыя за апошнія дзесяцігодзьдзі чатырохмесячныя вучэньні Steadfast Defender 2024 («Устойлівы абаронца»), якія сымулююць канфлікт з «практычна роўным праціўнікам», паведамляе Deutsche Welle.
У вучэньнях будзе задзейнічана каля 90 тысяч чалавек. У іх возьмуць удзел усе краіны NATO і кандыдат на ўступленьне ў альянс Швэцыя.
Манэўры, якія працягнуцца да канца траўня, ахопяць эўрапейскую тэрыторыю ад Нарвэгіі да Румыніі. Сцэнар манэўраў Steadfast Defender — напад Расеі на тэрыторыю саюзьнікаў, які прыводзіць у дзеяньне артыкул 5 дамовы NATO аб калектыўнай абароне.
Да гэтага часу самымі буйнымі манэўрамі апошніх дзесяцігодзьдзяў лічыліся Trident Juncture («Адзіны трызуб»), у якіх у 2018 годзе ўзялі ўдзел больш за 50 тысяч вайскоўцаў.
Апошнія параўнальныя маштабам вучэньні NATO правяло ў 1988 годзе, задзейнічаўшы тады ў іх больш за 125 тысяч салдатаў.
Маштабныя вучэньні — дэманстрацыя новай гатоўнасьці NATO
У Steadfast Defender 2024 таксама возьмуць удзел больш за 50 караблёў, ад авіяносцаў да эсьмінцаў, а таксама больш за 80 зьнішчальнікаў, верталётаў і бесьпілётнікаў і ня менш за 1,1 тыс. баявых машын, уключаючы 133 танк іі 533 баявыя машыны пяхоты.
Як заявіў галоўнакамандуючы Аб’яднанымі ўзброенымі сіламі альянсу ў Эўропе Крыстафэр Каволі, вучэньні пакажуць, што NATO можа праводзіць і падтрымліваць складаныя апэрацыі на сушы, моры, у паветры, кібэрпрасторы і космасе «на працягу некалькіх месяцаў, на працягу тысяч кілямэтраў, ад Крайняй Поўначы да Цэнтральнай і Ўсходняй Эўропы і ў любых умовах».
Са слоў кіраўніка вайсковага камітэта NATO Роба Баўэра, такі маштаб вучэньняў — гэта дэманстрацыя новай гатоўнасьці альянсу.
«Гэта рэкордная колькасьць войскаў, якую мы можам задзейнічаць і правесьці вучэньні ў такіх маштабах, па ўсім альянсе, праз акіян, ад ЗША да Эўропы», — сказаў ён.
Акрамя таго, кіраўнік вайсковага камітэта падкрэсьліў, што вайна — справа ня толькі вайскоўцаў:
«Калі справа даходзіць да вайны, як мы бачым ва Ўкраіне, гэта закранае ўсё грамадзтва».
