ЗША пашырылі санкцыі ў дачыненьні да Беларусі

5 сьнежня ЗША ўнесьлі ў санкцыйны сьпіс Беларусі 8 фізычных асобаў і 11 кампаніяў. Пра гэта паведаміла Міністэрства фінансаў ЗША.

Як паведамілі ў Мінфіне ЗША, новыя санкцыі мусяць «узмацніць ціск на аўтарытарны рэжым Аляксандра Лукашэнкі за жорсткае задушэньне дэмакратычнай грамадзянскай супольнасьці і за саўдзел у неапраўданай вайне Расеі супраць Украіны».

Сьпіс беларускіх чыноўнікаў і бізнэсоўцаў, якія трапілі пад санкцыі, папоўнілі:

• генэральны дырэктар рэспубліканскага ўнітарнага прадпрыемства «Белмытсэрвіс» Вадзім Бабарыкін,
• дырэктар ААТ «Зеніт-БелОМА» Мікалай Гайчук,
• генэральны дырэктар холдынгу «БелОМА» Аляксандар Мароз,
• дырэктар ААТ «Тытунь-Інвест» Віктар Пятровіч,
• бізнэсовец Аляксандар Шакуцін,
• бізнэсовец Павал Тапузідзіс, уладальнік «Табак-Інвест»,
• кіраўнік Беларускага таварыства Чырвонага Крыжа Дзьмітры Шаўцоў,
• навуковец ў галіне лазэрнай фізыкі і прыладабудаваньня, акадэмік Нацыянальнай акадэміі навук Беларусі Аляксей Шкадарэвіч.

Сярод кампаніяў пад санкцыі ЗША трапілі:

• Канцэрн «Беллеспаперпрам»,
• ААТ «ММЗ імя С.І. Вавілава — кіроўная кампанія холдынгу «БелОМА»,
• ААТ «Зеніт-БелОМА»,
• ААТ «Кіроўная кампанія холдынгу «Гарызонт»,
• ААТ «АЛЕВКУРП»,
• ААТ «Амкадор» — кіроўная кампанія холдынгу»,
• навукова-вытворчы холдынг дакладнага машынабудаваньня «Планар»;
• кіроўная кампанія холдынгу «Беларуская цэмэнтная кампанія»,
• РУП «Белмытсэрвіс»,
• НТЦ «ЛЭМТ» БелОМА;
• ААТ «Тытунь-Інвэст».

Санкцыі прадугледжваюць блякаваньне актываў у выпадку, калі яны знаходзяцца на тэрыторыі ЗША, а таксама арганізацый, якія на 50% і больш належаць названым у сьпісе асобам або кампаніям. Для тых, што супрацоўнічае з падсанкцыйнымі асобамі і кампаніямі, гэта пагражае другаснымі санкцыямі.

ГЛЯДЗІЦЕ ТАКСАМА:

У Палаце прадстаўнікоў Кангрэсу ЗША прайшлі слуханьні аб Беларусі з удзелам Ціханоўскай. ВІДЭА

• 5 сьнежня ў Палаце прадстаўнікоў ЗША праходзяць слуханьні «Будучыня свабоды і дэмакратыі ў Беларусі», на якіх абмяркоўваюць палітыку ЗША ў дачыненьні Беларусі, санкцыі супраць рэжыму Лукашэнкі і дапамогу грамадзянскай супольнасьці. У іх прымае ўдзел і дэмакратычная лідэрка Беларусі Сьвятлана Ціханоўская. Падчас слуханьняў яна заклікала Вашынгтон зрабіць больш жорсткімі санкцыі ў дачыненьні да беларускіх уладаў і пазбавіць іх магчымасьці абыходзіць абмежаваньні.
• Апошні раз ЗША ўводзілі санкцыі супраць Беларусі 9 жніўня 2023 году, у трэцюю гадавіну прэзыдэнцкіх выбараў у Беларусі. Тады пад абмежаваньні трапілі 8 чалавек (сыны і жонка бізнэсоўца Аляксея Алексіна, гендырэктар БМЗ Дзьмітры Корчык, гендырэктар ДФР КДК Ігар Маршалаў і яшчэ тры прадстаўнікі ДФР) і 5 арганізацый (авіякампанія «Белавія», ДФР КДК, Беларускі мэталюргічны завод, ТАА «Белкапсціл», Менскі завод грамадзянскай авіяцыі). Таксама пад санкцыі трапіў урадавы самалёт Canadair Region­al Jet CR-200ER (бартавы нумар EW-301PJ), які выкарыстоўваюць высокапастаўленыя чыноўнікі і сыны Аляксандра Лукашэнкі.