Парлямэнт Вугоршчыны прагаласаваў за выхад краіны зь юрысдыкцыі Міжнароднага крымінальнага суду ў Гаазе. Пра гэта паведаміў на сваёй старонцы ў сацыяльнай сетцы X міністар замежных спраў Вугоршчыны Пэтэр Сіярта.
Сіярта адзначыў, што суд страціў бесстароннасьць і давер.
У пачатку красавіка прэм’ер-міністар Вугоршчыны Віктар Орбан на сумеснай з прэм’ер-міністрам Ізраіля Біньямінам Нэтаньягу прэс-канфэрэнцыі ў Будапэшце заявіў, што Вугоршчына мае намер выйсьці зь юрысдыкцыі суду. Ён назваў гэта цьвёрдым і прынцыповым рашэньнем, абвінаваціўшы суд у палітызаванасьці. Нэтаньягу вугорскія ўлады арыштаваць адмовіліся.
У дачыненьні Нэтаньягу Міжнародны крымінальны суд выдаў ордэр на арышт па падазрэньні ў ваенных злачынствах у сэктары Газа. Вугоршчына, як краіна, якая ўдзельнічае ў працы суду, павінна была арыштаваць Нэтаньягу пасьля яго прыезду і перадаць яго ў Гаагу. Аднак Орбан яшчэ да візыту ізраільскага прэм’ера даў гарантыі, што гэтага не адбудзецца.
Вугоршчына стала першай краінай Эўразьвязу, якая спыняе ўдзел у Міжнародным крымінальным судзе. Раней адміністрацыя Дональда Трампа ўвяла ў дачыненьні суду санкцыі — якраз у сувязі зь перасьледам Нэтаньягу. Орбан тады ж заявіў, што Вугоршчыне неабходна перагледзець свае адносіны з прававым інстытутам, які знаходзіцца пад амэрыканскімі санкцыямі.
Рашэньне выдаць ордэр на арышт Нэтаньягу выклікала супярэчлівую рэакцыю і ў шэрагу іншых краін. У прыватнасьці, улады Нямеччыны далі зразумець, што не гатовы прытрымлівацца рашэньня суду, хоць і падкрэсьліваюць важнасьць яго працы. Крытыкі рашэньня суду ў дачыненьні Нэтаньягу ўказваюць на тое, што яно, на іх думку, падрывае легітымнасьць іншых рашэньняў суду, у прыватнасьці, аб ордэры на арышт расейскага прэзыдэнта Ўладзіміра Пуціна, які падазраецца ў датычнасьці да дэпартацыі ўкраінскіх дзяцей, што разглядаецца як ваеннае злачынства.
Першы прэцэдэнт, калі рашэньне Міжнароднага крымінальнага суду не выконвалася, адбылося летась у Манголіі. Гэтую краіну наведаў Пуцін, аднак улады краіны яго не арыштавалі.
Міжнародны крымінальны суд, створаны пад эгідай ААН, аб’ядноўвае больш за 120 краін сьвету. Шэраг буйных дзяржаў, у іх ліку ЗША, Расея і Кітай, не прызнаюць яго юрысдыкцыю. Ізраіль таксама яе не прызнае.
Форум