У студзені 2023 году было рэалізавана 756 аўтамабіляў, у лютым — 945, у сакавіку — 1202.
«Станоўчым фактарам зьяўляецца зьяўленьне на беларускім рынку новых брэндаў і мадэляў аўтамабіляў, — зазначыў у справаздачы генэральны дырэктар СЗАТ „БелДжы“, сябар праўленьня БАА Генадзь Сьвідзерскі. — Але, у той жа час захоўваецца сытуацыя перавышэньня пакупніцкага попыту над прапановай».
На яго думку, у другім квартале аўтадылерам неабходна павялічыць абʼём прапановы новых аўтамабіляў, каб збалянсаваць каньюнктуру рынку.
З чэрвеня 2022 году нязьменным лідэрам продажаў зьяўляецца Geely. Цяпер на яе рахунку 72 працэнты ад усіх прададзеных новых легкавых аўтамабіляў.
Акрамя продажу новых аўтамабіляў сябрамі БАА ўвоз і рэалізацыю транспартных сродкаў катэгорыі М1 (M1G) ажыцьцяўлялі і іншыя юрыдычныя, а таксама фізычныя асобы.
Паводле «БАА-Кансалт», яны ў першым квартале рэалізавалі ня менш за 250 новых легкавых аўто пераважна прэміум-сэгмэнту (БМВ, «Лексус», «Ланд Ровер», «Таёта» і «Мэрсэдэс»).
Па выніках 2022 года, сьведчаць зьвесткі БАА, дылеры прадалі 14 843 легкавыя аўтамабілі. У лідэрах Geely (4355), Lada (3782) і Kia (1462).
У 2021 годзе ў Беларусі прадалі 46 837 згаданых тыпаў аўтамабіляў, у 2020-м — 53 537, 2019-м — 64 504. За апошнія тры гады продажы скараціліся на 49 661 адзінку (-77%).
