Генэральны пракурор Беларусі Андрэй Швед на прапанову КДБ накіраваў у Вярхоўны суд заяву аб прызнаньні Абʼяднанага пераходнага кабінэту (АПК) «тэрарыстычнай арганізацыяй», паведаміла прэс-служба ведамства.
Як сьцьвярджаюць у Генэральнай пракуратуры, мэта АПК — «дзеяньні па плянаваньні, рыхтаваньні і ўчыненьні замахаў на незалежнасьць, тэрытарыяльную цэласнасьць, сувэрэнітэт і грамадзую бясьпеку Беларусі шляхам захопу і ўтрыманьня дзяржаўнай улады».
Пра стварэньне Абʼяднанага пераходнага кабінэту ў жніўні 2022 году абʼявіла дэмакратычная лідэрка Беларусі Сьвятлана Ціханоўская.
Задачай АПК як «пастаяннага выканаўчага органу» дэмакратычных сілаў ёсьць распрацоўваньне, прыняцьце і выкананьне «палітычных рашэньняў, неабходных для захаваньня незалежнасьці і сувэрэнітэту Беларусі, пераадоленьня палітычнага крызісу ў Беларусі, абароны інтарэсаў, правоў і свабодаў яе грамадзянаў і забесьпячэньня пераходу да дэмакратычнага кіраваньня ў Беларусі».
У 2022 годзе, менш чым празь месяц пасьля ўтварэньня, Абʼяднаны пераходны кабінэт рашэньнем КДБ Беларусі быў прызнаны «экстрэмісцкім фармаваньнем».
Ціханоўская адрэагавала на зварот Шведа
Сьвятлана Ціханоўская, якая ўзначальвае АПК, адрэгавала на за зварот пракурора Шведа ў Вярхоўны суд:
«Гэта яшчэ адна дэманстрацыя бездапаможнасьці лукашэнкаўскага рэжыму. Яны навешваюць ярлыкі экстрэмістаў і тэрарыстаў на людзей, якія клапоцяцца і змагаюцца за інтарэсы беларускага народу. Для іх «тэрарысты» — гэта ўсе, хто супрацьстаіць беззаконьню, дапамагае рэпрэсаваным, распаўсюджвае праўду.
Паводле Ціханоўскай, Аб’яднаны пераходны кабінэт быў створаны, каб абараняць незалежнасьць Беларусі, дамагацца вызваленьня палітвязьняў, падтрымліваць рэпрэсаваных і рыхтаваць мірны пераход да дэмакратыі.
«Мы змагаемся ня зброяй, а праўдай, салідарнасьцю і міжнароднай падтрымкай. Лукашэнкаўскі рэжым, адказны за злачынствы супраць чалавечнасьці, за ўдзел у агрэсіі супраць Украіны і рэпрэсіі супраць уласнага народа, цяпер спрабуе перавярнуць усё з ног на галаву.Але ніякія ярлыкі, ніякія пагрозы не паўплываюць на нашу працу. Насамрэч гэта яшчэ раз пацьвярджае, што мы робім добрую і правільную справу».
Аб’яднаны пераходны кабінэт заявіў, што працягне працу на ўсіх кірунках — нацыянальная бясьпека, сацыяльная дапамога, культурнае адраджэньне, моладзевая палітыка, міжнародныя справы і падрыхтоўка транзыту ўлады.
«Мы працуем у інтарэсах беларусаў, і пагрозы рэжыму ня спыняць нашую дзейнасьць».
У офісе Ціханоўскай таксама заявілі, што рэжым чарговы раз спрабуе перакласьці віну з хворай галавы на здаровую, але гэта яму не ўдасца:
«Тэрарызм — гэта дасягненьне сваіх палітычных мэтаў гвалтоўным шляхам, гэта значыць праз ужываньне супраць мірнага насельніцтва гвалту, забойстваў, незаконных затрыманьняў, катаваньняў, запалохваньня. То бок роўна тое, што рэжым рабіў у 2020-м у адносінах да мірных беларусаў і працягвае рабіць цяпер — каб утрымацца ва ўладзе».
Што такое Аб’яднаны пераходны кабінэт Беларусі
На канфэрэнцыі «Новая Беларусь» у Вільні 9–10 жніўня Сьвятлана Ціханоўская заявіла аб стварэньні Аб'яднанага пераходнага кабінэту, які будзе працаваць на галоўныя мэты:
- Абараняць незалежнасьць і сувэрэнітэт Рэспублікі Беларусь, прадстаўляць нацыянальныя інтарэсы Беларусі. Ажыцьцявіць фактычную дэакупацыю Беларусі.
- Аднавіць канстытуцыйную законнасьць і правапарадак.
- Распрацаваць і рэалізаваць меры па спыненьні незаконнага ўтрыманьня ўлады, забясьпечыць транзыт улады ад дыктатуры да дэмакратыі, стварыць умовы для правядзеньня сумленных і свабодных выбараў.
- Распрацоўваць і выконваць рашэньні, неабходныя для дасягненьня дэмакратычных перамен у Беларусі.
- І ў выніку гэтага павінны быць вызваленыя ўсе палітвязьні.
У складзе Кабінэту пад кіраўніцтвам Ціханоўскай сярод іншых працуюць:
- Павал Латушка — прадстаўнік Кабінэту па транзыце ўлады;
- Аляксандар Азараў — па аднаўленьні правапарадку;
- Валер Кавалеўскі — па замежных справах;
- Валер Сахашчык — па абароне і нацыянальнай бясьпецы;
- Вольга Гарбунова — прадстаўніца ў сацыяльных пытаньнях;
- Аліна Коўшык — прадстаўніца па нацыянальным адраджэньні.
Аб’яднаны пераходны кабінэт Ціханоўскай заявіў, што пачынае рыхтаваць беларусаў да старту пляну «Перамога».
Аб’яднаны пераходны кабінэт патрабуе і будзе дабівацца безумоўнага вываду ўзброеных сіл Расейскай Фэдэрацыі з тэрыторыі Беларусі.
Аб’яднаны пераходны кабінэт заснаваў Місію дэмакратычнай Беларусі ў Брусэлі і накіраваў свайго прадстаўніка ў Кіеў.
