У ноч на 23 студзеня на новай устаноўцы гідракрэкінгу зноў адбыўся пажар. На ёй цяпер праводзяцца пусканаладачныя работы.
23 студзеня ў 3:32 паведамілі, што адбыўся выцек газу, у якім ёсьць вадарод, і дызэльнай фракцыі. Яны загарэліся.
Пажар зьліквідавалі, ніхто пры гэтым не пацярпеў, тэхналягічны працэс не парушыўся. Работнікі МНС ахалоджвалі тэхналягічныя канструкцыі з мэтай іх аховы.
19 студзеня на ўстаноўцы ўжо здарыўся пажар. Тады адбылася разгермэтызацыя фільтра, у выніку чаго адбыўся выхад гідрагенізату з наступным гарэньнем.
Шмат гадоў Беларусь набывала нафту ў Расеі, перапрацоўвала яе на сваіх НПЗ і прадавала нафтапрадукты на Захад і ва Ўкраіну. Нафтаперапрацоўка была адной з асноўных крыніц прытоку грошай у Беларусь, але з увядзеньнем санкцый Эўразьвязу Беларусь пазбавілася гэтай крыніцы даходу. Адмовіліся ад беларускіх нафтапрадуктаў і ва Ўкраіне, НПЗ трапіў пад санкцыі і там.
Вядома, што на Мазырскім НПЗ ад красавіка 2022-га ўзмоцненая ўзброеная ахова, за прадпрыемствам стаіць сыстэма СПА.
