У Гомлі зноў арыштавалі Ільлю Міронава
Былога палітвязьня з Гомля Ільлю Міронава зноў затрымалі. Здарылася гэта, калі ён пайшоў у РАУС на «прафіляктычную гутарку», паведамляе «Вясна».
Вядомы гомельскі валянтэр Ільля Міронаў атрымаў пакараньне 12 днямі арышту, у яго сканфіскавалі тэлефон. Такое рашэньне прыняў суд Савецкага раёну Гомля.
Ільлю Міронава затрымалі 8 сьнежня. Ілью ўжо затрымлівалі ў сярэдзіне лістапада. Тады яго адправілі за краты на 5 дзён за «распаўсюд экстрэмісцкіх матэрыялаў» (19.11 КаАП) — нібыта за падпіску на «экстрэмісцкі» канал. У ізалятары, як сам ён пісаў, «да нас ставіліся горш, чым да крымінальнікаў».
А ў кастрычніку былога палітвязьня асудзілі на 1,5 года калёніі ў «справе Зельцара». За кратамі яго трымалі больш за год.
У «сьпіс экстрэмістаў» дадалі яшчэ 46 чалавек. Цяпер у ім 2163 чалавекі
9 сьнежня МУС Беларусі чарговы раз абнавіла «Пералік грамадзян Беларусі, замежных грамадзян або асобаў без грамадзянства, якія маюць дачыненьне да экстрэмісцкай дзейнасьці».
У яго дадалі яшчэ 46 чалавек. Так, у сьпіс сярод іншых трапілі «змоўшчыкі» Аляксандар Фядута, Юры Зянковіч, Дзяніс Краўчук, пэнсіянэрка Эма Сьцепулёнак, актывістка «Эўрапейскай Беларусі» Алена Лазарчык, паведамляе «Вясна».
Дыджэя з Горадні асудзілі на год калёніі за абразу Лукашэнкі
У судзе Ленінскага раёна Горадні асудзілі палітзьняволенага Кірыла Жалудка паводле ч. 1 арт. 368 (Абраза Лукашэнкі) Крымінальнага кодэксу. Судзьдзя Руслан Гурын прызначыў палітвязьню адзін год пазбаўленьня волі ў калёніі агульнага рэжыму, паведамляе «Вясна».
Кірыл — сьпявак, дыджэй, паэт, вядоўца мерапрыемстваў
Выйшаў на волю 70-гадовы палітзьняволены зь Берасьця Віталь Зарадзей
Віталь — былы вайсковец, ліквідатар аварыі на ЧАЭС. У Берасьці ён быў вядомы тым, што пісаў звароты да ўладаў.
29 сакавіка 2021 году ў дом Віталя ўварваліся людзі з аўтаматамі. Віталя затрымалі і асудзілі на 2 гады пазбаўленьня волі за «абразу судзьдзі і прэзыдэнта». Прысуд вынес судзьдзя Вадзім Здановіч, які часта ўдзельнічае ў палітычна матываваных працэсах.
Віталя Зарадзея абвінавацілі ў тым, што ён падаваў у канцылярыі судоў позвы, дзе, паводле экспэртызаў, «дапускаў нэгатыўную ацэнку» судзьдзяў і Аляксандра Лукашэнкі. Сілавікі налічылі 7 такіх «правапарушэньняў».
Пакараньне Віталь Зарадзей адбываў у шклоўскай калёніі № 17.
8 сьнежня палітзьняволены выйшаў на волю, паведаміў «Белсат».
74-гадовую палітзьняволеную Натальлю Таран этапавалі ў калёнію
Натальлю абвінавацілі паводле трох артыкулаў Крымінальнага кодэкса:
- ч.1 арт. 368 («абраза» Лукашэнкі),
- ч.2 арт. 367 («паклёп» на Лукашэнку)
- і арт. 369 («зьнявага прадстаўніка ўлады»).
Падрабязнасьці суду невядомыя — працэс адбываўся ў закрытым рэжыме. Праваабаронцам вядома толькі, што да прысуду жанчына заставалася пад падпіскай аб нявыезьдзе. Суд пакараў пэнсіянэрку Натальлю Таран пазбаўленьнем волі на 3 гады і 6 месяцаў у калёніі агульнага рэжыму.
Нядаўна жанчыну перавялі ў гомельскую жаночую калёнію № 4.
