Уначы Расея бамбіла Запарожжа і Мікалаеў. Раніцай — Дніпро, Жытомір і Кіеў.
У Кіеве пашкоджаны энэргетычны аб’ект на левым беразе Дняпра
У Кіеве небясьпека атак трымалася зь невялікім перапынкамі ўсю ноч і раніцу. На пачатку 10-й гадзіны мэр Кіева Віталь Клічко паведаміў аб пашкоджаньні на левым беразе Дняпра аб’екта крытычнай інфраструктуры.
Напэўна, вядзецца аб цеплаэлектрацэнтралі ў Дзясьнянскім раёне — гэта найбольшы ў сталіцы раён у колькасьці насельніцтва, бо адразу пасьля вубуху ў жылым масіве адключылася энэргазабесьпячэньне.
У Кіеве расказалі аб наступствах ранішніх абстрэлаў
Першы намесьнік кіраўніка Кіеўскай гарадзкой дзяржаўнай адміністрацыі Мікола Паварозьнік заявіў, што сытуацыя з аднаўленьнем пашкоджанай ранішнімі абстрэламі крытычнай інфраструктурай застаецца вельмі складанай.
«Адмыслоўцы цяпер працуюць над аднаўленьнем вода- і энэргазабесьпячэньня. У частцы будынкаў па левым беразе сьвятло аднавілі, працы трываюць, але сытуацыя надзвычайна складаная, таму што пашкоджаны аб’ект уваходзіць у пералік крытычных аб’ектаў інфраструктуры горада», — сказаў Мікола Паварозьнік на брыфінгу ў Кіеве 18 кастрычніка.
Прадстаўнік адміністрацыі заклікаў жыхароў Кіева эканоміць ня толькі электраэнэргію, але і ваду.
«Што датычыць адключэньняў, яны магчымыя, таму мы мусім максымальна зьнізіць спажываньне, каб яна была хаця б у мінімальным доступе», — дадаў ён.
Мікола Паравозьнік удакладніў, што з-пад завалаў разбуранага дронам жылога будынку ў Шаўчэнкаўскім раёне сталіцы выратавальнікі дасталі цела яшчэ адной загінулай. «Ад учорашніх абстрэлаў загінулі 5 грамадзян», — паведаміў прадстаўнік кіеўскай адміністрацыі.
Мэр Кіева Віталь Клічко паведаміў, што ў выніку абстрэлаў раніцай 18 кастрычніка загінулі 2 грамадзян.
Прэсавы афіцэр Дзяржаўнай службы Ўкраіны ў пытаньнях надзвычайных сытуацый Аляксандар Харунжы на брыфінгу ў Кіеве паведаміў, што ў выніку ранішняга абстрэлу 18 красавіка ва Ўкраіне загінулі пяць грамадзян і яшчэ пяцёра атрымалі траўмы.
«З 7 кастрычніка, калі пачаліся масавыя абстрэлы, ва Ўкраіне загінулі 70 грамадзян, траўмаваныя больш як 245 грамадзян, пашкоджана звыш 380 аб’ектаў», — сказаў ён.
Аляксандар Харунжы ўдакладніў, што ў Кіеве пасьля абстрэлу ў Дзясьнянскім раёне пажар ахапіў 1400 квадратных мэтраў пашкоджанага аб’екта.
«Па жылых будынках ня маем інфармацыі, але, улічваючы, што яны на адлегласьці, то максымум, што магло быць, — гэта павыляталі шыбы», — паведаміў ён. Паводле яго, двое загінулых, якіх знайшлі пад заваламі, былі супрацоўнікамі ЦЭЦ.
На Днепрапятроўшчыне няма сьвятла і праблемы з вадой
У выніку ранішняй ракетнай атакі безь сьвятла застаўся і горад Дніпро. Паводле абласных уладаў, без электрычнасьці засталося некалькі раёнаў абласнога цэнтру і некалькіх навакольных населеных пунктаў. Абясточана адна з помпавых станцый мясцовага водаканалу, таму шмат спажыўцоў засталіся без вады.
Ад выбухаў у жылых будынках побач з атакаванымі інфраструктурнымі аб’ектамі павыляталі шыбы.
Пра ахвяры таксама пакуль нічога невядома. Паветраная трывога працягваецца.
Улады Жытоміра заклікалі забраць дзяцей з адукацыйных устаноў
У Жытоміры расейцы таксама ўдарылі па аб’ектах, якія забясьпечваюць горад электрычнасьцю і вадой. Горад цалкам абясточаны.
Мэр абласнога цэнтру Сяргей Сухамлін паведаміў, што мэдычныя ўстановы ўдалося перавесьці на рэзэрвовае забесьпячэньне электраэнэргіяй. «Інфармацыю аб пацярпелых і пашкоджаньні дамо пазьней. Усе службы пачнуць працу адразу па завяршэньні новых атак», — паведаміў кіраўнік горада.
Улады заклікалі бацькоў пасьля завяршэньня трывогі забраць сваіх дзяцей са школ і дзіцячых садкоў. Праз адсутнасьць электраэнэргіі там ня могуць прыгатаваць дзіцячыя абеды. Навучаньне зноў плянуюць перавесьці на дыстанцыйны рэжым.
Дроны даляцелі да Запарожжа
Запарожжа расейцы атакуюць ня толькі з тэрыторыі акупаваных раёнаў Запароскай і Херсонскай абласьцей. Уначы ішла атака дронамі. У выніку адной з такіх атак загарэўся інфраструктурны аб’ект і разбураны склад.
Паводле ўладаў, у абодвух выпадках абышлося без пацярпелых.
У Мікалаеве цалкам зруйнавалі жылы дом
У Мікалаеве, нягледзячы на сталыя пагрозы і атакі, улады змаглі аднавіць энэргазабесьпячэньне.
У ноч на 18 кастрычніка расейская ракета цалкам разбурыла двухпавярховы жылы дом у цэнтры гораду. З-пад завалаў пакуль дасталі цела аднаго мужчыны.
Мікалаеў і Мікалаеўскую вобласьць атакавалі спачатку дронамі, а потым яшчэ і ракетамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
