Разгляд скаргі на прысуд па «справе Ціханоўскага», па якой праходзіць і журналіст Свабоды Ігар Лосік, адбыўся ў Вярхоўным судзе ў Менску 31 траўня і 1 чэрвеня. Судзьдзі пакінулі прысуд у сіле, Ігар асуджаны на 15 гадоў пазбаўленьня волі ў калёніі ўзмоцненага рэжыму. Празь дзень пасьля абвяшчэньня рашэньня Вярхоўнага суду Дар’я Лосік сустрэлася з мужам у гомельскім СІЗА-3.
«Настрой у Ігара ня вельмі добры, — кажа Дар’я. — Ён ня вельмі каб чакаў, што судзьдзі адумаюцца і пачнуць нарэшце сумленна выконваць сваю працу. Ні ў якім разе. Але Ігар задае такое пытаньне — „Што вы робіце?“ Краіна ў вельмі дрэнным стане, і ня толькі эканамічным. Гэта краіна-ізгой на дадзены момант. Няўжо ўсе гатовыя ісьці да канца, каб пакінуць пасьля сябе выпаленую зямлю?».
Пакуль невядома, калі і куды дакладна этапуюць Ігара Лосіка. Аднак ён ужо цяпер мае апасеньні, што на новым месцы яму будзе вельмі складана, расказвае Дар’я.
«У калёніях практыкуецца зьмяшчаць палітвязьняў у ШЫЗА, — кажа яна. — Ігар кажа, што кожная яго пасадка ў ШЫЗА будзе суправаджацца дзеяньнямі зь яго боку. А я ад сябе скажу так — кожнае дзеяньне з боку Ігара будуць суправаджаць і мае дзеяньні. І з кожным разам усё больш жорсткія. Пакуль усё гэта ня спыніцца. Усе людзі, якія гэтым займаюцца, настолькі слабыя, што могуць зьдзекавацца толькі з тых, хто ўжо за кратамі. Яны ўсе невінаватыя, але маюць тэрміны большыя, чым рэцыдывісты, гвалтаўнікі і забойцы».
Дар’я кажа, што Ігар Лосік абяцае на любы прэсінг за кратамі адказваць адпаведнымі крокамі, ён настроены рашуча. Сустрэча з мужам працягвалася стандартныя дзьве гадзіны. Перад этапаваньнем Ігар падлячыў зубы. Перапіска ў яго па-ранейшаму абмежаваная. Лісты даходзяць толькі ад самых блізкіх родных.
«Ігар разьюшаны, — кажа Дар’я. — І я, у прынцыпе, таксама. Думаю, гэта было заўважна па маім учорашнім звароце. Ігар не разумее, чаму ніхто з боку ўлады ня бачыць наперад. Падрыхтаваў рэчы для пераезду. Пакуль у сваёй ранейшай камэры. Ігар больш гаварыў пра тое, што ўсім тым, хто прымае такія рашэньні, як разгляд апэляцыі 1 чэрвеня, трэба думаць сваёй галавой. Гэта не было рамантычнае спатканьне, хоць мы ня бачыліся ўжо месяц. Я магу зразумець Ігара, я адчуваю тое ж самае. Ігар пастаянна гаварыў мне пра тое, што нейкі факт ціску на яго прывядзе да рэакцыі зь яго боку».
Дар’я спадзяецца атрымаць яшчэ хаця б адно спатканьне, пакуль Ігар у Гомлі. Яна кажа, што ўпэўненасьці ў такой магчымасьці няма.
31 траўня Вярхоўны суд Беларусі разгедзеў апэляцыі 6 удзельнікаў так званай «справы Ціханоўскага» і пакінуў прысуды бязь зьменаў. Пазаштатны кансультант Беларускай службы Радыё Свабода Ігар Лосік быў асуджаны ў сьнежні 2021 году судом у Гомлі на 15 гадоў калёніі ўзмоцненага рэжыму.
Прэзыдэнт мэдыякарпарацыі «Радыё Свабодная Эўропа/Радыё Свабода» Джэймі Флай назваў рашэньне Вярхоўнага суду «глыбока расчаравальным» Беларусі і заявіў, што кампанія «не супакоіцца, пакуль Ігар ня будзе зноў на волі і не ўзьяднаецца са сваёй сям’ёй, жонкай Дарʼяй і дачкой Паўлінай».
