Першапачаткова чакалася, што распачаць будаўніцтва тэрміналу могуць у 2023 годзе, аднак карэктывы ў пляны ўнесла пандэмія, паведаміў дырэктар Нацыянальнага аэрапорту Менску Вячаслаў Харанека ў інтэрвію часопісу «Эканоміка Беларусі».
«У больш аддаленай пэрспэктыве мы, вядома, хацелі б пачаць будаўніцтва новага тэрміналу — заходняга. Разьлічвалі пачаць гэты праект у 2023 годзе, але пандэмія ўнесла карэктывы ў тэрміны. Хутчэй за ўсё, будаўніцтва пачнецца толькі ў 2025–2027 гадах. У плянах таксама ўзьвядзеньне ангараў, паркінга і гатэлю», — сказаў ён.
У 2019 годзе аэрапорт абслужыў 5 100 000 пасажыраў. У наступныя два гады іх колькасьць зьнізілася. Пандэмія прымусіла скараціць і штат аэрапорту:
«Аптымізацыя закранула каля 40% інжынэрнага і кіроўнага складу, да таго ж ніхто не адмяняў натуральнай цякучасьці кадраў. На гэты момант у аэрапорце колькасьць супрацоўнікаў складае каля 2800 чалавек», — сказаў Харанека.
Пасьля ініцыдэнту з пасадкай самалёта Ryanair зь менскага аэрапорту сышлі заходнія кампаніі
Адказваючы на пытаньне пра маркетынгавую палітыку аэрапорту, Харанека заявіў, што разьлічвае на зьняцьце абмежаваньняў Эўразьвязу (уведзеных пасьля прымусовай пасадкі самалёта Ryanair, у выніку якой затрымалі Рамана Пратасевіча і Сафію Сапегу), што дазволіць вярнуцца ў менскі аэрапорт заходнім авіякампаніям.
«Плянуем працягнуць прыцягненьне іншых эўрапейскіх перавозчыкаў пасьля правядзеньня аналізу эўрапейскага рынку, улічваючы пераразьмеркаваньне пасажырапатокаў з пачатку пандэміі. Хутчэй за ўсё, будуць разьвівацца і тыя напрамкі, якія раней не абслугоўваліся ў нас — Цюрых, Осла, Афіны, Сафія і іншыя», — сказаў Харанека. Таксама аэрапорт вядзе перамовы з авіякампаніямі зь Віетнаму, Тунісу, Тайлянду, Ірану, Марока, Катара, Малдовы, Кеніі, Этыёпіі, Вэнэсуэлы.
