Прадстаўніца «Беларускай калійнай кампаніі» Ірына Саўчанка заявіла, што ў выпадку спыненьня транзыту беларускіх угнаеньняў празь Літву прэтэнзіі паўстануць ня толькі ў прадпрыемства «Беларуськалій», але і ў пакупнікоў прадукцыі. Пра гэта яна расказала ў інтэрвію LRT.
«Санкцыі ЗША супраць „Беларуськалію“ не даюць прававой падставы для спыненьня дзейнасьці Літоўскай чыгункі ў перавозцы ўгнаеньняў. Мы лічым, што можам працягваць спакойна працаваць безь якіх-небудзь збояў».
Дата 1 красавіка, да якой, паводле санкцый, могуць дзейнічаць кантракты з БКК, на думку Саўчанкі, «ня мае ніякага значэньня для транспартаваньня беларускіх калійных угнаеньняў празь Літву».
«Мы спадзяёмся, што транзытны калідор для беларускіх угнаеньняў праз Клайпедзкі порт захаваецца і пасьля 1 красавіка. І што дамова будзе выкананая. У дамове таксама ўздымаецца пытаньне аб адказнасьці. Бо калійныя ўгнаеньні — гуманітарная нагрузка, яны зьяўляюцца асновай харчовай бясьпекі і маюць унікальнае сацыяльнае значэньне. Асабліва цяпер, падчас пандэміі COVID-19, з ростам пагрозы голаду, расьце колькасьць галодных людзей ва ўсім сьвеце. Гэта ня простая эканоміка ці палітыка. Ад рэгуляваньня паставак угнаеньняў у сельскую гаспадарку залежыць і жыцьцё людзей».
Таксама прадстаўніца БКК зазначыла, што калі Літва паспрабуе спыніць транзыт у аднабаковым парадку, беларускі бок будзе падаваць у суд, а таксама ў суд могуць падаць пакупнікі ўгнаеньняў, якія ня хочуць плаціць па завышаных цэнах. Сумы пазоваў, па словах Саўчанкі, могуць дасягаць «мільярдаў эўра». Акрамя таго, Беларусь у такім выпадку можа спыніць чыгуначныя транзытныя зносіны зь Літвой, і тады «Літоўская чыгунка застанецца бяз працы».
Што варта ведаць пра санкцыі ЗША
