Сёлета ў праграму ўвайшлі 24 фільмы: зь іх 19 са Швэцыі, Даніі, Фінляндыі, Ісьляндыі, Нарвэгіі, Літвы, Латвіі і Эстоніі, а таксама 5 фільмаў беларускіх творцаў.
Беларусы цяпер ствараюць кіно і ў Польшчы, і ў Францыі, і ў Бэльгіі, і ў Эстоніі, і ў ЗША. У «беларускай» праграме 2021 году будуць наступныя фільмы:
«Тата», Польшча, 2020, Марыя Якімовіч
У сваёй аўтабіяграфічнай хроніцы Марыя Якімовіч спрабуе зразумець жудасныя мэтамарфозы свайго бацькі. У фільме выкарыстаныя старыя фатаздымкі, сямейная VHS-хроніка, аб’яднаныя ў аўтарскае выказваньне з дапамогай тэхнікі каляжу.
«Агульная мова», Эстонія, Беларусь, 2020, Воля Чайкоўская
Рэжысэрскі дэбют заснавальніцы «Паўночнага зьзяньня» Волі Чайкоўскай. У адзін са сваіх прыездаў у бацькоўскую хату ў Віцебску яна паставіла камэру і запісала свае размовы з бацькамі.
«Тры таварышы», Расея, Беларусь, 2020, Уладзімер Уладзімеравіч Казлоў
Адзін дзень з жыцьця Глеба, Улада і Гошы, маладых супрацоўнікаў аддзелу продажаў аптовай кампаніі. Уладзімер Казлоў, ураджэнец Магілёва, які ўжо даўно жыве ў Маскве, паказвае ў нечым небясьпечнае, а ў нечым агіднае ў сваім натуралізьме падарожжа.
«Кунашыр», Францыя, 2021, Уладзімер Георгіевіч Казлоў
Гісторыя француза зь беларускімі каранямі Ўладзімера Казлова (у беларускай праграме сёлета два рэжысэры з аднолькавымі імем і прозьвішчам). Фільм пра адзін з Курыльскіх астравоў. Да 1946 году там жылі японцы і айны, але аднойчы іх выселілі савецкія ўлады. Цяпер на востраве жывуць рыбакі і памежнікі.
«Сойка», ЗША, 2020, Анастасія Сергіеня
«Сойка» — аўтабіяграфічная карціна менскай рэжысэркі Анастасіі Сергіені. Мігранцкі Нью-Ёрк вачыма беларускі Ганны.
Выбіраў беларускія фільмы для «Паўночнага зьзяньня» кінакрытык Антон Сідарэнка. Вось ягоны відэазварот:
Усе стужкі можна будзе глядзець ня толькі на дэсктопах, але і на мабільных прыладах iOS праз мабільную аплікацыю фэстывалю. Купіць пакеты на блёкі праграмы і на канкрэтныя фільмы можна на сайце фэстывалю.
