Ігар Лосік знаходзіцца за кратамі з 25 чэрвеня 2020 году — 341 дзень. Палітвязень ужо азнаёміўся з матэрыяламі абвінавачваньня, яго перавялі ў СІЗА Гомеля, дзе неўзабаве павінен пачацца судовы працэс. Апошнія навіны ад Ігара Свабодзе расказала яго жонка Дар’я, якая ў аўторак 1 чэрвеня адвезла мужу перадачу.
«Пакуль у Ігара нічога новага, — кажа Дар’я Лосік. — Адзінае, ён абураецца моцна, бо яго кожны раз даглядаюць перад тым, як адвесьці на сустрэчу з адвакатам. Распранаюць цалкам. Тое самае было і перад спатканьнем са мной. Распранаюць кожны раз, правяраюць запісы ў нататніку. Ігар таксама шмат заяваў пісаў, прасіў прадставіць яму тэлевізар у камэру. Але тэлевізара так і няма. Усе яго газэты засталіся ў Жодзіне на складзе. Яму сказалі, што там знаходзіцца інфармацыя, якую яму нельга ведаць. Але там жа толькі газэты зь іх каталёгу, што тады можна ведаць?»
Па словах Дар’і Лосік, ні дата пачатку працэсу, ні тое, дзе ён будзе праходзіць і ў якой форме, невядомыя. «Нам ужо хацелася б ведаць самім, арганізоўвацца паступова, — гаворыць Дар’я Лосік. — Я пляную знаходзіцца ў Гомелі, пакуль будзе ісьці суд. Але нам нічога ніхто не гаворыць, ніводнага слова. Лісты ў Гомель, праўда, ідуць даволі нядрэнна. Ігар прасіў усіх пісаць яму, ён будзе адказваць кожнаму. Калі ў Жодзіне лісты прыходзілася чакаць па 2-3 тыдні, то ў Гомелі гэта 1-2 дні. Я з Гомелю ад Ігара ўжо атрымала таксама ліст».
Напісаць Ігару можна па адрасе: СІЗА-3. 246003, Гомель, вуліца Кніжная, 1А.
Акрамя Лосіка, на працэсе па яго справе сярод абвінавачаных будуць Сяргей Ціханоўскі, Мікола Статкевіч і іншыя палітвязьні.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
