За студзень — люты 2020 году зь Беларусі экспартавалі на зьнешнія рынкі ўсяго 736,7 тысячы тонаў нафты — на 62,4% менш, чым за студзень — люты 2019-га, адзначае БелаПАН.
Пастаўкі нафтапрадуктаў на ўкраінскі рынак пры тым зьнізіліся толькі на 17%. Найбольш упаў экспарт нафтапрадуктаў у краіны па-за СНД — аж на 75%.
Зьмяншэньне паставак нафтапрадуктаў зьвязваюць з падзеньнем імпарту нафты.
У Беларусь за студзень — люты імпартавалі толькі 903,2 тысячы тонаў нафты — на 69,4% менш, чым у першыя два месяцы 2019 году.
У грашовым выражэньні імпарт нафты скараціўся на 71,1%. Экспарт нафты ў гэтыя месяцы ня вёўся.
З Расеі за гэты час паступіла 902,2 тысячы тонаў нафты, з Казахстану — 1016 тонаў. Пры тым тона нафты з Расеі каштавала 338,96 даляра (на 5,7% ніжэй, чым летась), з Казахстану — 370 даляраў.
Нафта з Нарвэгіі, дастаўленая ў Беларусь празь Літву, у статыстыку ня трапіла. Першая партыя нарвэскай нафты складала 86 тысячаў тонаў, другая, якая прыйшла ўжо ў сакавіку, — 160 тысячаў тонаў.
Імпарт нафтапрадуктаў у Беларусь за студзень — люты 2020 году пры тым вырас на 76,2% адносна першых двух месяцаў 2019 году. У 14 разоў вырас імпарт лёгкіх дыстылятаў, практычна ўсе (10 336 тонаў з 10 965) былі пастаўленыя з Казахстану (летась іх з Казахстану зусім не пастаўлялі).
Экспарт беларускіх нафтапрадуктаў за межы ўпаў у аб’ёмах на 62,4% — да 736,7 тысячы тонаў, у грашовым выражэньні — на 59,4%, або да 375,05 млн даляраў.
Расея спыніла пастаўкі нафты ў Беларусь. Што здарылася
- 1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
- Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
- Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
- 31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
- Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
- Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
- Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
- Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
- Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
- Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
- Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
- Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.
Беларусь — адзіная краіна ў сьвеце, якая багацее на суседзкай нафце, — эканаміст
Усё пачалося з Пуціна. Кароткая гісторыя нафтагазавых канфліктаў Беларусі і Расеі
Ці ўратуе Беларусь эўрапейская нафта? Разьбіраемся з экспэртамі
