Іран прадаставіў украінскім спэцыялістам доступ да чорных скрыняў самалёту МАУ, які пацярпеў авіякатастрофу пад Тэгеранам. Пра гэта паведаміў міністар замежных справаў Украіны Вадзім Прыстайка на брыфінгу ў пятніцу.
«Мы атрымалі доступ як да дэталяў самалёту, так і да месца падзеньня... Зараз наша каманда атрымала доступ і да „чорных скрыняў“, і мы плянуем бліжэйшым часам пачаць рэканструкцыю перамоваў. Мы таксама атрымалі доступ да запісаў [перамоваў] дыспэтчараў з цэнтру кіраваньня палётамі ў аэрапорце Тэгерану і нашых пілётаў. Уся гэтая інфармацыя пакуль аналізуецца», — заявіў кіраўнік украінскага МЗС.
Прыстайка таксама дадаў, што цяпер удалося сабраць узоры ДНК ад усіх сваякоў загінулых у авіякатастрофе, нават у чалавека, які пражывае на акупаванай сэпаратыстамі тэрыторыі.
У склад украінскай дэлегацыі, якая займаецца расьсьледаваньнем авіякатастрофы, уваходзяць 50 чалавек.
Раней прадстаўнікі ЗША, Канады і Вялікабрытаніі заяўлялі, што «вялікая верагоднасьць» таго, што самалёт быў зьбіты іранскай ракетай, магчыма памылкова. Іран гэта адмаўляе.
Крушэньне ўкраінскага самалёту ў Іране. Што трэба ведаць
- Самалёт Boeing 737-800 NG (рэйс PS752, рэгістрацыйны нумар UR-PSR) вылецеў каля 6:10 8 студзеня маршрутам Тэгеран — Кіеў, зьнік з радараў празь некалькі хвілінаў пасьля ўзьлёту.
- Усе на борце загінулі. На борце было 167 пасажыраў, а таксама 9 чальцоў экіпажу. Авіякампанія МАУ апублікавала сьпісы загінулых пасажыраў і чальцоў экіпажу.
- Сярод загінулых у катастрофе было найбольш грамадзян Ірану (82 чалавекі) і Канады (63 чалавекі), а таксама 11 грамадзян Украіны (2 пасажыры і 9 чальцоў экіпажу), 10 грамадзян Швэцыі, 4 — Аўганістану, 3 — Нямеччыны і 3 — Вялікай Брытаніі, паведаміў міністар замежных спраў Украіны Вадзім Прыстайка.
- Самалёт быў выраблены ў 2016 годзе, атрыманы МАУ непасрэдна з заводу Boeing, апошні раз прайшоў плянавае тэхнічнае абслугоўваньне 6 студзеня 2020 году. МАУ заяўляе, што гарантуе спраўнасьць сваіх самалётаў і высокую кваліфікацыю пілётаў.
- Паводле першай рэакцыі іранскага боку, самалёт разьбіўся з тэхнічных прычынаў, якія прывялі да аварыі рухавіка.
- 11 студзеня, праз 3 дні пасьля катастрофы, прэзыдэнт Ірана Хасан Роўхані прызнаў, што іранскія вайскоўцы па памылцы зьбілі пасажырскі Boeing 737 «Міжнародных авіяліній Украіны». Ён распарадзіўся знайсьці вінаватых у гэтай трагедыі.
- Камандуючы ваенна-касьмічнымі сіламі Ірана Амір Алі Хаджызадэ паведаміў, што апэратар супрацьпаветранай абароны Ірану самастойна вырашыў выпусьціць крылатую ракету па самалёце, ня здолеўшы звязацца з камандаваньнем.
