Сустаршыню Беларускай хрысьціянскай дэмакратыі двойчы асудзілі 10 студзеня на 15 сутак арышту (сумарна — 30 сутак) за акцыі супраць паглыбленьня інтэграцыі Беларусі і Расеі. Гэта адбылося ў судзе Савецкага раёна Менску праз 5 гадзінаў пасьля таго, як ён выйшаў на волю пасьля мінулых 15 сутак арышту.
Павал Севярынец пасьпеў трапіць дамоў пасьля арышту. На суд ён не пайшоў. Ён расказваў, што ў ізалятары яго паднялі яшчэ ўначы і загадалі зьбіраць рэчы. Ён думаў, што так рыхтуюць да наступнага суду і новых «сутак». Але высьветлілася, што ў тэрмін зьняволеньня залічылі пяць гадзінаў затрыманьня 18 сьнежня, калі «здымалі на камэру папярэджаньні пра дзяцей і ялінку».
На суды 10 студзеня Павал Севярынец у суд не зьявіўся. На працэсе прысутнічала ягоная маці Тацяна Севярынец. Дзьве справы паводле ч. 3 арт. 23.34 КаАП за ўдзел у мітынгах 20 і 21 сьнежня разглядала судзьдзя Вера Галаўкова.
Раней у раскладзе было пазначана, што адну са справаў будзе разглядаць судзьдзя Аляксандар Воўк. Аднак потым, фактычна перад пачаткам працэсу, расклад памянялі і абедзьве справы перадалі Галаўковай. Яны разглядаліся хутка, адна за адной.
У суд зьявіўся толькі адзін сьведка, міліцыянт Віталь Івашкоў. Другі міліцыянт не прыйшоў «праз занятасьць на службе».
Паводле сьведкі, Севярынец яму «вядомы як апазыцыйны лідэр». Івашкоў расказаў, што падсудны ўдзельнічаў у несанкцыянаванай акцыі супраць інтэграцыі, выкрыкваў «Жыве Беларусь» і «Ганьба», «заклікаў грамадзянаў». На плошчы было каля 200 чалавек. Міліцыянт таксама спаслаўся на трансляцыю «Белсату».
Судзьдзя адзначыла, што Севярынец зрабіў правапарушэньні паўторна цягам году, і ў справе ёсьць дакумэнт, згодна зь якім дазвол на мерапрыемства не даваўся.
Маці Севярынца спытала судзьдзю:
«А ці трэба браць дазвол, каб бараніць краіну?»
Пастанова пра новыя суткі для Паўла Севярынца, паводле судзьдзі, «падлягае неадкладнаму выкананьню, але можа быць абскарджана ў Менскі гарадзкі суд ці суд Савецкага раёна цягам пяці сутак ад часу атрыманьня яе копіі».
10 сьнежня Паўла Севярынца судзілі ў дзьвюх адміністрацыйных справах за ўдзел у мітынгах супраць інтэграцыі з Расеяй. Акрамя арышту Севярынцу раней прысудзілі штрафы ў 1275 і 1350 рублёў (на другі суд яго не даставілі з арышту). Ён сустрэў за кратамі і дзень народзінаў (30 сьнежня палітыку споўнілася 43 гады), і Новы год, і Раство.
Цягам 10 студзеня маюць прайсьці яшчэ два дзясяткі судоў над удзельнікамі сьнежаньскіх пратэстаў супраць інтэграцыі з Расеяй, якія адбыліся 7, 8, 20 і 21 сьнежня 2019 году.
Суды пачаліся яшчэ ў канцы 2019 году — штрафаў прысудзілі на ня менш як 16 тысяч рублёў, 11 актывістаў сустрэлі Новы год за кратамі. Працэсы аднавіліся 8 студзеня, за дзень прысудзілі штрафаў ня менш як на 6885 рублёў, 9 студзеня — на больш як 33 тысячы рублёў.
Севярынец не апошні з арыштаваных за пратэсты сьнежня-2019, хто выйшаў на волю: яшчэ чакаецца вызваленьне Стаса Шашка і Алеся Чахольскага (10 студзеня), Максіма Ўрбановіча (11 студзеня).
Акрамя таго, 9 студзеня меў выйсьці на волю пасьля 15 сутак арышту блогер Дзьмітры Казлоў (вядомы як «Шэры кот»), але яго ня выпусьцілі — прысудзілі яшчэ 15 сутак. Таксама за дзень да меркаванага вызваленьня адбыўся суд над блогерам Сяргеем Ціханоўскім (канал «Страна для жизни») — яму таксама прысудзілі яшчэ 15 сутак.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
