Фаервэркі вядомыя яшчэ ад 7-га стагодзьдзя, калі ў старажытным Кітаі падчас рытуалаў зь іх дапамогай нібыта адганялі злых духаў. Старажытныя кітайскія хронікі паведамлялі, што часам ад гэтай раньняй піратэхнікі пачыналіся пажары, а людзі атрымлівалі апёкі.
Сучасная піратэхніка можа быць вельмі прыгожым відовішчам, але яна дагэтуль рэгулярна робіць шкоду. Вось некалькі прыкладаў.
Эдынбург, Шатляндыя, 2012
На фэстывалі ў сталіцы Шатляндыі адна з ракетаў ударылася аб тэхнічную канструкцыю і ўпала ў скрыню з іншымі ракетамі. Усё выбухнула адначасова і выклікала вялікую паніку сярод гледачоў. На шчасьце, ніхто не пацярпеў.
Таўндзі, М’янма, 2012
У М’янме ў лістападзе традыцыйна сьвяткуюць завяршэньне сэзону дажджоў. Звычайна на гэтае сьвята ў паветра запускаюць шарыкі са сьвечкамі. Але гэтым разам кош паветранага шару нагрузілі піратэхнікай, якая выбухнула нізка над зямлёй. Гэтым разам абышлося без ахвяраў, але ў 2014 годзе пасьля падобнага выпадку два чалавекі загінулі.
Валенсія, Гішпанія, 2013
На гішпанскім фэстывалі La Mascletá нават заплянаваныя выбухі могуць напалохаць, але вялікага выбуху у канцы не чакаў ніхто. Зноўку ж, пацярпелых, на шчасьце, не было.
Лос-Анджэлес, ЗША, 2013
Каля 10 тысяч чалавек сабраліся на сьвяткаваньне Дня незалежнасьці ЗША ў прыватным ранча каля Лос-Анджэлесу. Некалькі фаервэркаў выпадкова выбухнулі на зямлі, непадалёк ад гледачоў, якія стаялі на аўтамабільнай паркоўцы. Тады паведамлялася што некалькі дзясяткаў чалавек атрымалі дробныя пашкоджаньні.
