Як паведаміў Свабодзе Павал Севярынец, адзін з арганізатараў і актыўных удзельнікаў акцый пратэсту супраць рэстарацыі «Поедем поедим» ля Курапатаў, сёньня лідэры апазыцыі і актывісты зьбяруцца апоўдні, каб падвесьці вынікі трох тыдняў вахты і дамовіцца наконт плянаў кампаніі.
Месца сустрэчы — ля брамы рэстарацыі «Поедем поедим».
Свабода вяла жывую трансьляцыю з сустрэчы і прэсавай канфэрэнцыі актывістаў.
Як чакаецца, у ёй возьмуць удзел намесьнік старшыні Партыі БНФ Аляксей Янукевіч, сустаршыня БХД Павал Севярынец, лідэр руху салідарнасьці «Разам» Вячаслаў Сіўчык, паэт Уладзімер Някляеў ды іншыя.
21 чэрвеня абаронцы Курапатаў падвялі вынікі трохтыднёвай вахты. Першы пікет адбыўся 31 траўня, а з 1 чэрвеня актывісты з розных партый, грамадзкіх арганізацыі выходзяць паводле графіку на штодзённыя пікетаваньні, спрабуюць не прапусьціць на тэрыторыю рэстарацыі «Поедем поедим» машыны, а таксама раздаюць буклеты.
Павал Севярынец прывёў лічбу — за 3 тыдні вахту прайшлі больш за 300 чалавек, прыяжджалі людзі з рэгіёнаў: зь Ліды, Бярозаўкі, Гомля, Віцебску, іншых гарадоў. Пікетаваньні будуць працягвацца. Цяпер задача — працягваць міжнародны розгалас.
«29 чэрвеня ў Беларусь прыяжджаюць дэлегацыі замежных краінаў на адкрыцьцё мэмарыялу ў Трасьцянцы. Мы спадзяёмся, што прадстаўнікі дэлегацый Аўстрыі, Польшчы, Нямеччыны наведаюць і Курапаты», — кажа Севярынец.
Старшыня АГП Анатоль Лябедзька паведаміў, што празь некалькі дзён у Брусэлі адбудзецца парлямэнцкая асамблея «Эўранэсту», а таксама падзеі, якія ладзіць Эўрапейская народная партыя.
«26 чэрвеня ў Брусэлі будзе адмысловая дыскусія па Беларусі, і наша правацэнтрысцкая кааліцыя будзе даводзіць пра сытуацыю ў Курапатах. Мы будзем працаваць з парлямэнцкімі дэлегацыямі Аўстрыі, Польшчы Нямеччыны, каб чальцы дэлегацый падчас наведваньня Менску прыехалі ў Курапаты.
Што тычыцца больш актыўнага ўдзелу сяброў АГП у вахтах, мы цяпер крыху вызваліліся пасьля правядзеньня абласных канфэрэнцый, і людзей будзе прыходзіць больш. Да таго ж у Курапаты прыйдуць і нашы „маральныя аўтарытэты“ — Зінаіда Бандарэнка, Станіслаў Багданкевіч, Міхаіл Чыгір», — запэўніў спадар Лябедзька.
Лідэр руху салідарнасьці «Разам» Вячаслаў Сіўчык зрабіў некалькі абвестак пра наступныя захады. 22 чэрвеня а 18-й вечара — ускладаньне кветак да магілы Васіля Быкава, 26 чэрвеня — Астравецкі шлях, 3 ліпеня — акцыя на скрыжаваньні Талбухіна і Незалежнасьці, ускладаньне кветак да крыжа ў Парку Чалюскінцаў.
Старшыня БНФ Аляксей Янукевіч, рэжысэр Аляксей Туровіч, сьвятар Леанід Акаловіч, лідэр АГП Анатоль Лябедзька, іншыя выступоўцы запэўнілі, што вахта ў Курапатах будзе працягвацца.
Што важна ведаць: пратэсты супраць новай рэстарацыі ў Курапатах
- Рэстаран «Поедем поедим» у Курапатах меркавана запрацаваў увечары 5 чэрвеня.
- Грамадзкія актывісты штодня ад 31 траўня пікетуюць забаўляльны комплекс, патрабуючы закрыцьця рэстарацыі.
- 1 чэрвеня рэстаран «Поедем поедим» пачаў рэклямавацца ў інтэрнэце.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Адрас рэстарацыі супадае з адрасам ТАА «Амізбел», якое было створана кампаніяй «Белноватэкс груп». Апошняя валодае шэрагам фэшэнэбэльных рэстаранаў у Менску.
- Рэстарацыя стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- Будоўля забаўляльнага комплексу пад назвай «Бульбаш-хол» пачалася ў 2010 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
7 адказаў на наіўныя пытаньні пра рэстаран ля Курапатаў і пратэсты супраць яго
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
